كتب الشاعر/ رضا أبو شنب #صاحبك مات #

الشاعر رضا ابو شنب
مصر /المنصورة/ميت غمر
قصيدتي الجديدة
(صاحبك مات)

بعد ما روحت في نوم وسبات
فجاءه سمعت صريخ وصوات
 اللي تقول ياحبيبي يا ابني
واللي تقول ولمين هتسبني
واللي تسخن في الستات
قمت بسرعة ناديت علي ابني
دا مفيش غيرك حد يفدني
مين اتخرج من الأموات؟
ساب الدنيا وراح للاخرة
ركب القطر وسابنا وفات
شاف الدنيا مش مستاهلة
شافها جميلة ولكن واحلة
حطه القحله وبنت ذوات
واحدة عجوزة ولابسة الطرحة
زي البيضة في قلب الفرخة
قبل ما تدي بتقول هات
زي ما تجري عليك بتسيبك
واللي يصيبك يبقي نصيبك
مهما تعيش جواها ساعات
                          ********************
ابني وراجع يجري عليا
شوفت يابابا الدنيا الفانية
عم السيد صاحبك مات
لسه امبارح كان مقابلني
كان بيهزر ويطمني
بكرة هنبقي من البشوات
كان بينور لينا الدنيا
لما يزورنا في كل تلات
قلت يا ابني الحزن في قلبي
ماسك فيا وبيعذبني
دانا كان بيني وبينه حاجات
عشرة طويلة وياما لعبنا
ياما سهرنا وكنا نبات
كانت الدنيا تمر علينا
تاخد منا ويوم تدينا
تلعب بينا وكنا اخوات
هو ده يابني حال الدنيا
زي ما تيجي بتمشي في ثانية
يوم تدينا ويوم تحرمنا
كلنا فيها من الأموات
قبل العيد اهو راح السيد
حتي العيد حالف ما يعيد
بعد ما قالو السيد مات
                              *******************
قوم يا حبيبي نروح الدفنة
تلاقيه سامع أو بيشوفنا
مهما نغيب هو بيعرفنا
عمك كان صاحب كرامات
بعد الدفنة قعدنا شوية
نشرب قهوة معاها الميه
وبنتسلي بالحكايات
اللي يحط معاها الدقه
واللي يكتر في البهارات
واللي تمللي يعيب في الدنيا
واللي يقول الناس مقامات
واحد تاني وكان بحالات
قال ازاي السيد مات
لسه امبارح كان مقابلني
وبيتمني يروح عرفات
جاي سيادتك وتفهمني
إن السيد صاحبك مات
قلت تعالي بدل ما تلومني
نقرأ الفاتحة للاموات