رسالة الى امي
فاكر يومها لما قالوا
ازاي يا شاعر
يا اللي بكلامك بتدوب قلوب
وبتعرف تلمس بيه مشاعر
ازاي لحد اليوم ده لسة
ما كتبتش حاجة عن الست امك
اللي ما عاشتش يوم عشانها
عاشت ليك وقلبها يا واد ده لسة ضامك
معقول نسيت ولا عامل فيها بتنسى
مين اللي قال الكلام ده يا بشر
ده انا فيها قلت كلام ينطق الحجر
انا بس كنت باختصر
كلامي كان ف الجون
انا ايش بس اكون
يعنى كنت باقول بس المفيد
ما كنتش عايز يومها اقول واعيد
اصل امي عايزة ييجي ميت قوالة
اصل امي مش ست عادية امي حالة
حالة ما بتحصلش
ف العمر الا مرة
زي الموت زي الولادة ما تتكررش
قلت هى يعنى كيميا ولا حاجة اصلا صعبة
دا الكلام ماسك زمامه زى طفل وغاوى لعبة
وابتديت وقلت امي
حبها ف روحي ودمي
اكتر حد دفا روحي وشالى همي
ايوة انا ماشي مطمن معاها حتى لو كنت متغمى
قالوا يعنى قلت ايه جديد كل اللي قلته اتقال واتعاد
هو ده قد عشقك ده احنا قلنا كلامك عنها هيزلزل بلاد
امال بس عامل فيها شاعر
ده احنا كل واحد فينا فاكر
هتقول اللي عمره ف يوم ما اتقال
ولا يخطر لينا كمان على بال
قلت طب يلا هابدأ كلامي بالصلاة ع الزين
هاقول واقول واقول اللي جوة قلبي من سنين
نقطة ومن اول السطر
من وقت ما كنت نطفة والايام دارت وبقيت جنين
من ساعة ما كنت روح مستتية تطلع للحياة
مع اول صرخة ليا مع حب منك واصل منتهاه
لما قالوا يومها يا امي اني ولد
كنتي حاسة بالسعادة جالك سند
مع انك كنتي جايبة غيري تلاتة وكمان صبية
قلت اخر العنقود هدية ربي بعتها ليا
ولما ابتديت حروف الكلام بيها اتهجا
كان قلبك يومها م الحياة بيترجا
ربي يكون راضي عليا
يحبب كل خلقه فيا
دعوتك يا امي في ساعة فجرية
فتحت لى ياما بيبان كتير كت متقفلة
وصلتنى ردود كتيرة واجوبة لاسئلة
هو صحيح الضنا للدرجة ديا غالي
لما كنت بانام يا امي وانتي سهرانة الليالي
بتجهزى ف كتبي وادواتي وانا رايح المدرسة
اصلك يا امي كنتي وما زلتي فيا مأ سسة
حاجات كتيرة حلوة روحي بيها لحد النهاردة متونسة
نسيتي وجعك وابتسمتي
يوم ولادتي
يارب ليك الشكر والحمد وليك قلبي بيسجد
وهبتني من روحي روح سميتها محمد
سامحيني يا امي انا باعتذر لك
وقلبي النهاردة بيتأسف لك
لما بقصر معاكي يا امي ف السؤال
بحجة ان الدنيا واخدانى والشغل والعيال
تقول لى انا بس عايز اسمع حسك
عشان تطمن روحي عليك ربنا يا حبيبي حارسك
حتى وانت بعيد عن عيني شايلاك ف روحي وقلبي لامسك
يا ضي عيني انا ف حقي خلاص مسامحة
اصلى جيت الدنيا عشان اكون لك فرحة
كنت عايز يا امي اتكلم عنك
واحكي واوصف كل ركن ف قلبك
لقيت الكلام اللي عليكي اترد عليا
اتاريكي يا امي اقرب ما باتصور ليا
باختصار يا امي ملقيتش كلام يوصفك
كان نفسي يا امي بحد احسسك
اني فعلا بقيت شاعر
كان نفسي كلامي يبقى قادر
يوصلك احساسي بيكي
بس حقيقي لقيتني عاجز
بس جايز
القى ف يوم حاجة اكبر م الكلام
وقبل ما اختم باهديكي يا امي السلام
كغاية ان ربي راضي عليكي
رسالة الى امي
محمد عبد المنعم
منعم
ليست هناك تعليقات:
إرسال تعليق