مسرحية مجانين بالزوفة ..... تأليف الشاعر طارق السيد 01225065702
الشخصيات ( حسب الظهور )
(1) المجانين التلائة بالشارع
(2) الدكتور النفسي
(3) زوجة الدكتور
(4) الفرارجي ( خال الزوجة)
(5) التمرجي
(6) المريض الأول ( الصياد)
(7) المريض الثاني (الكمسري)
(8) المريض الثالث (حارس حديقة الحيوان )
(9) المريض الرابع (الإعلامي)
(((( المشهد الأول ))))
يرفع الستار على 3 مجانين في الشارع يغنون
مجانين مجانين إحنا المجانين
نازلين طالعين رايحين جايين
نسأل أيها حد نقابله
معانا ولا انت مع التانين
يخاف ويقول أنا أيوة معاكو
نرد نقوله إحنا التانين
هههههههههههههههههههههههه
مجانين مجانين إحنا المجانين
ثم يظهر الدكتورينظر يمينا ويسارا ويحدث نفسه ( أنا إيه اللي جابني هنا شكلي توهت ولا إيه ... مفيش حد هنا أسأله
ثم يجد الثلاث مجانين ويتحرك أحدهم إليه وهو ألدغ اللسان وينظر إلى الدكتور بتعجب فيقول له الدكتور ....
(الدكتور) مساء الخير
المجنون رقم 1 (ألدغ) .. مساك عثلية
الدكتور ...قوللي ياحلو
المجنون ....أأمر ياعنيا
الدكتور .....إسمك إيه
المجنون ....أنا إسمي عطية
الدكتور .....ودا من إيه
المجنون ...من الملوخية
شربتها ثخنة لسعت فيا
الدكتور ....قوللي ياحلو بنص لسانك
يابو عقل أكبر منه ودانك
عايز أروح حي السبتية
المجنون .. السبتية ... السبتية
السبتية دي بعد الجمعة
أو تقريبا قبل الحد
تركب أتوبيس يوم الأربع
أو لتنين من شارع السد
(تظهر على الدكتور علامات الدهشة ويقول له إنت مجنون يابني ولا عبيط و لا حكايتك إيه ) ثم ينتقل اليه المجنون الثاني ويقوله
المجنون رقم (2)
تعالى يافندي لبهلول أفندي
دا شارب بانجو ونص براندي
عايز إيه ؟
الدكتور .... عايز أروح
المجنون...ساكن فين ؟
الدكتور .....في السبتية
المجنون رقم (2) ...تمشي كدا على طول على طول
هتوصل حي إسمه الشرابية
تشتري منه جوزين شرابات
تلبسهم على راسك ديا (ويضربه على رأسه ضربة خفيفة بطريقة هيستيرية)
وتجعر قوي قوي وتقول
عايز أروح حي السبتية
سألت عطية أنا وبهلول
وصفولي وصفة تقلوظ فيا
الدكتور ..... أنا وقعت في شلة مجانين ولا إيه
المجنون رقم (3)
سيبك منهم دول مجانين
مش واعين ولا هم فاهمين
قبل ماتسأل حد يافندي
إعرف قبلا بتسأل مين
الدكتور.... كانت المجانين هتجنني
شكلك إنت اللي هتفهمني
عايز أروح حي السبتية
إوصفلي إعمل معروف فيا
المريض ....عيني يافندي أنا هوصفهالك
بس بشرط تطول بالك
تركب أتوبيس نمرة تمانية
من موقف في ميدان ألمانيا
قدام شارع الشانزليزيه
إللي شماله قصر الإليزيه
شارع مشهور جدآ جدآ
على ناصيته فرن كلوت بيه
بعد ماتركب شاور عقلك
تلفاه تنبل بيبحلقلك
أصلا لو كان عقلك فاقلك
كان يصرخ ويقول أحيه
الدكتور ....أحيه طب هيقول ليه أحيه
علشان الشانزليزيه في ألمانيا
طب إيه يعني ماهو الإليزيه
ياكبدي عليه سكنته في ثانية
في وصفة أمك في كلوت بيه
سيبك من عقلي وفهمني
هنزل فين أنا يامجنني
المريض ..تنزل بعد الصين بمحطة
بعد ماتنزل هتلاقي بطة
تركب على ضهرها وتغني
حطة يابطة يادقن القطة
الدكتور ....يامحلى العيشة مع المجانين
أنا اللي أستاهل جالوصين طين
بسأل ناس أنا في البطيخ
حمار وحلاوة على السكين
علشان أروح حي السبتية
ألبس شرابات م الشرابية
وأنزل من أتوبيس ملاحيس
أركب بطة على الملوخية
(الدكتور يتجنن ويجري وراهم)
طب يلا ياولاد المجانين
ليلتكم سودا وزي الطين
(المجانين الثلاثة يردوا عليه أثنا هروبهم منه إلى الكواليس حتى لا يضربهم )
إهدى ياعمنا مانتش فاهم
دا احنا ياعمنا ناس تانين
الدكتور ..مجانين هنا ومجانين في العيادة أنا هلاقيها منين ولا منين تعاليلي ياما
((((المشهد الثاني)))) شقة الدكتور
ويدخل الدكتور شقتة ماسكا في يدة اليسرى حذاؤه .....متسللا ... خائفا .. محدثا نفسه
الدكتور .... يارب تكون أمنا الغولة نايمة
وحتى لو كانت نايمة ... لسانها مابينامش
عاملة زي ستات الهنود الحمر بياكلو إجوازهم
والله انا خايف تطلعلي من أي شق في الشقة زي التعبان بلسانها ال..... بلسم
(يقول كلمة بلسم لأنه رأي زوجته فجأة خارجة من المطبخ مرتدية المريلة وبيدها سكينة المطبخ قائلة له
الزوجة ...... إنت جيت يامنيل
الزوج ....... لأ لسه ماجيتش ... دا خيالي هو اللي جه وبعتني أشتريله علبة سجاير وزماني جاي
إنتي بقى مش ناوية تروحي تشتري ورقة بوستة
الزوجة ....... ورقة بوستة !!!
الزوج ......... أيوة زي أمينة
الزوجة ...... أمينة مين إنطق ... تعرفها منين .. ماأنا عارفاك عينك تزوغ على أي عرسة في الشارع
الزوج ....... ياست انا بتكلم عن شويكار في دور أمينة..
الزوجة ...... يعني كمان تعرف شويكار اللي ساكنة معاها في نفس الدور... دا انت ليلتك سودا
الزوج ....... إيه الدماغ الجزمة دي ... ياستي بقولك دا فيلم إسمه الراجل دا هيجنن أم اللي جابوني
.... وبعدين أنا عمري ماعيني زاغت على أي حد ... لا في الشارع ولا غير الشارع
الزوجة ......ليه ... عينك اللي عايزة خزأها دي مازاغتش عليا قبل الجواز
الزوج ....... لأ أنا عيني مازاغتش عليكي أنا عيني إنطست فيكي
الزوجة ......وإيه اللي خلاها تنطس ياخويا ؟
الزوج ...... حجمك ... عيني تروح يمين تلاقيكي تروح شمال تلاقيكي . حاجبة الرؤية .... ودا بنسميه في علم النفس ... العمى الحيثي
الزوجة ......وحياة خالتك ...عمى في عينك إنت وهي ..بقولك إيه .ماتوهنيش .. كنت فين ؟ رد .. ردت المية في زورك
الزوج ........ياست انتي هو لسانك دا مابيفصلش .... وررررك ,,,, ورررك .... ورررك
إيه مفيش كلمة حلوة .... شوية دلع ..... حبة رومانسية ....كل شوية كنت فين كنت فين ... ياساتر
الزوجة ......من عينيا ياحبيبي هدلق عليك جردل رومانسية وأغنيهلك كمان
الزوجة ....يامقندل ومنيل
رد وقلنا فينك
عدي علينا وميّل
وإتنيل على عينك
أه ياخيبة أملي أنا فيك
ألفبن وكسة عليك
هو الأبعد أطرش
بقالي يومين بناديك
فين مصروف البيت
فين ياللي عاملي عبيط
أجي أقولك شخلل جيبك
تتنيل وتظيط
بتودي فلوسك فين
قول فين ياغراب البين
على طول كحيان ومفلس
ظهرك محني من الدين
الزوج .... ياولية إتلمي شوية
وخفي الضغط عليا
لسانك زي المبرد
عمال يبرد فيا
وأنا عامل زي الثور
في الساقية ألف وأدور
ومغمضالي عنيا
لجل ماأشوف النور
الزوجة .... ما انا كل مابطلب حاجة
تعملي فيها خواجة
وتبرطم وتقوللي
تشيزوفرانيا وفوبيا
وماأدرك إيه مع لوبيا
فين مصروف البيت
ل هخلي انا ليلتك كوبيا
الزوج .... ياولية سكوت بقا هس
طلباتك مابتخلص
ودليل راحة بالك
تتخني إنتي وأخس
مفيش في دماغك غير
المانيكير والباديكير
ومضيعة كل فلوسي
على إيد الكوافير
يوم ماإتجوزتك كان
نور الشمس مابان
ماشوفتش يوم أنا منك
غير طولة بس لسان
يوماتي أنا بسمع نبرك
قولي مين على عيشتي أنا جابرك
ياولية إختشي وإتلمي
وخافي من ضمة قبرك
الزوجة ..... قبري أنا .... قبر يلمك ياشيخ .... عايزة فلوس عشان اجيب هدية
الزوج ....... هدية لمين ياجميلة المحيا
الزوجة .......لجارتنا الست عزيزة وجوزها عم إمام ياسبع البرمبة
الزوج ...... ليه هدية بمناسبة إيه..... هي الست عزيزة خلفت ؟
الزوجة ..... خلفت إيه ياراجل إنت دي قد أمك
الزوج ...... مالكيش دعوة بأمي ... أنا ل
بقولك أهو
الزوجة ..... ليه يعني .... أم المصرين ياخي ها ها ها
الزوج ...... (في سره) يارب ياشيخة وانتي بتضحكي تخش في زورك سحلية وتكون دنيئة .. تاكل ماتشبع
الزوجة ..... شايفاك بتبرطم .... بتقول إيه ؟
الزوج .......بقول نجيبلهم هدية ليه يعني
الزوجة ......معزومين بكرة عندهم ع الغدا ولازم نجيبلهم هدية
الزوج........ مالقتيش إلا الناس دول لأ ياستي مش هروح دي الست عزيزة دي عليها شلوط ولا ليناردو وميسي
واخدة درع الشلوت الذهبي من جامعة الشلاليت الدولية
الزوجة .....جامعة إيه ياخويا ....ودي فين دي ؟
الزوج ..... في المهندسين جنب أحمد عرابي
الزوجة .... إنت هتشتغلني ياراجل إنت .. أحمد عرابي دا في التل الكبير
الزوج ....... لأ ماهو رجع م التل من أسبوع كدا
الزوجة ...... و رجع ليه بقا يابو العريف ؟
الزوج ........... رجع لما لقى التل إختل
الزوجة ........ والله ماحد إختل غيرك يابعيد ... إنطق ... خايف من شلاليت الست عزيزة ليه
الزوج ............إنتي ماتعرفيش عملوا ايه في اخر عزومة ليهم
الزوجة ........ عملوا إيه إنطق ... إلهي تقع ماتنطق
عزموا ياعيني سعيد بيومي
على ملوخية وعلى ديك رومي
عم سعيد قلع الجلابية
في غمضة عين إبن الجنية
وإتمطع وضرب غطسين
وإتشقلب جوة الملوخية
وطلع المدعو سعيد بيومي
من الملوخية نهش في الرومي
قام سي إمام وقال دا كلام
الضرب في ميت يبقى حرام
ضحك بيومي وأرخى في جفنو
وقال إكرام الميت دفنو
قامت الست عزيزة م القعدة
إديتلو قوام بوكسين في المعدة
وجوز إقلام مع كام شلوت
وقالتله تحلي بدولا ياسعدة
الزوجة ...... يستاهل دا راجل طفس ... هبر الديك الرومي لوحده .. والمثل بيقول يابخت من زار وخف
الزوج ........ طب ماتيجي إحنا نخف خالص ومانروحش من أصله
الزوجة ........ياراجل إنت عايز تجنني ... بقولك لازم نروح .... إنت عايزهم ياكلوا وشي
الزوج ( في سره) ..... يارب ياشيخة ياكلوا وشك وانا ادعيلهم بالهنا والشفا ..ومطرح مايسري يمري
الزوجة .... بتبرطم بتقول إيه
الزوج .......أبدا ياحبيبتي بقول حاضر من عينيا
ممكن تغديني بقا عشان ألحق أناملي شوية وأصحى أروح العيادة عندي شغل كتير
الزوجة ... همك على بطنك ...أستنى لما اجيبلك طاجن المسقعة
الزوج (يحدث نفسه) ... مسقعة ... يعني بتنجان ... أنا هلاقيها منين ولا منين بتنجان في البيت وبتنجان في العيادة
حاسس إن مخي هيبزر
(تدخل الزوجة معاها صينية عليها طاجن مسقعة وخبز)
الزوج .....إستني إستني أنا بشبة على الطاجن دا ...مش دا الطاجن اللي بتأكلي فيه القطة
الزوجة .... أيوة هو .... المواعين كلها وسخة .... أعملك ايه ... هاتلي خدامة فلبينية
الزوج .... لأ أكل في طاجن القطة ورجلي فوق رقبتي
الزوجة ..... عايز حاجة تاني
الزوج ...._ ينونو) ناااااو .... نااااو
(يرن جرس الباب)
الزوجة ......قوم شوف مين ع الباب
الزوج ...... انتي مش شايفاني باكل ياست إنتي
الزوجة ...... بقولك قوم بدل ماجي ألبسك طاجن المسقعة في دماغك
الزوج ....... إلهي يلبسك جن ياشيخة ويكون عبيط يلزقك على قفاكي كل خمس دقايق...... أيوة ياللي بترن الجرس متسربع على إيه ...داخل الجنة ياخي
الزوجة ...... مين ع الباب يامدهول
الزوج ....... دا خالك المعلم بشندي الفرارجي ...... إتفضل يامعلم
الزوجة ...... خالو إزيك واحشني ياخالو
الزوج ....... يتمتم بصوت خافت .. خالو أه خالو تقولش البت خريجة الميرديديه وخالها دا يبقى سعادة كاظم بيه
الفرارجي .... إزيك يابنت أختي وحشاني ... أخبارك إيه وعاملة إيه مع النطع جوزك
الزوج ...... محدثا نفسه والله ماشوفت أنطع منك يابغل ... عيلة معفنة طالعين من صفيحة زبالة واحدة
الفرارجي ......بتقول حاجة ياسي لفندي
الزوج ......... لأ يامعلم بقول نورت
الزوجة ....... إيه ياخالو اللي انت جايبه معاك دا .... إنت جاي بيت حد غريب ... ليه تكلف نفسك بس
الفرارجي .... ولا تكاليف ولا حاجة دول ديك وبطة يستاهلو الدبح قلوا أدبهم ... حلفت 100 يمين ماهم قاعدين عندي
ولا دقيقة ...خديهم انتي حلال عليكي بالهنا والشفا
الزوجة ...... ربنا يخليك ليا ياخالو ... أخش بقى أعملك كوباية شاي من اللي هيا
الزوج ....... خير يامعلم قلو أدبهم عليك ولا إيه
الفرارجي ... يستجروا ... ماعاش ولا كان اللي يقل أدبه على المعلم بشندي أكبر فرارجي في المنطقة كلها
الزوج......... أمال قلو أدبهم إزاي يعني ؟
الفرارجي .....إستلطخوني يالطخ
الزوج ......( محدثا نفسه ) وبعدين بقى في الراجل اللي عايز 100جزمة على دماغه دا
الفرارجي ..... بتقول إيه ياجدع انت .....علي صوتك
الزوج .. أبدا يامعلم بقولك أحكيلي إيه اللي حصل انت عارف ان أنا طبيب نفسي وأقدر أعرف وأحلل دوافعهم كويس
الفرارجي ..... تحلل إيه ..... دوافعهم هاهاها إنت بكتيره تحللهم بول وبراز هاهاها .... إنت مابتضحكش ليه مستبوخ كلامي ولا يكونش دمي تقيل على قلبك .... إنطق ماتفورش دمي
الزوج ....... أبدا يامعلم دا انت دمك زي العسل حتى بص هاهاها ..هاهاها
الفرارجي .... أيوة كدا .... عالم تخاف ماتختشيش
خلاص هحكيلك حكاية دكر البط
وبطة شمال مع ديك منحط
دكر البط إتشال وإتحط
وفط ونط من الشباك
علشان شاف البطة بتاعته
في حضن الديك أبو ست إوراك
بعد مانط وقع وإنبط
وهات ياصراخ كاك كاك كاك
ياديك العشة يابو عضام هشة
يانافش ريشك هنا وهناك
بكرة تلاقي ياديك 100 ديك
يدوك قلمين على أم قفاك
وإنتي يابطة ياخاينة العشرة
بكرة هلاقي بدالك عشرة
إتغندرتي وهزيتي ديلك
خليتي ديك العشة يجيلك
في لحظة طيش قلعتي الريش
وقلتي تعالى ياديكي نعيش
بعتي ياخاينة الغالي رخيص
لما طاوعتي كلام إبليس
جيبتي يابطة العار للبط
علشان ديك سافل منحط
الزوج ..... لأ يستاهلو الدبح فعلا ... وخصوصا ان البطة كانت قالعة ريشها .. يعني حالة تلبس
الفرارجي .... أه تلبس .. ومن ساعتها دكر البط عنده حالة إكتئاب وعمال يكاكي ... حالته تقطع القلب
أروح أنا بقا أجيبله اتنين بيره ... يمكن يفك .... سلام
الزوج ..... طب والشاي يامعلم ... يامعلم ... يلا في داهية إلهي دكر البط يسكر ويرزعك بإزازتين البيرة في دماغك
الزوجة ...... إيه دا ....هو خالو راح فين ؟
الزوج ...... وصل لخمارة يني يجيب إزازتين بيرة لدكر البط عشان عنده إكتئاب
الزوجة ...... إنت إتجننت ياراجل إنت .... إنت بتخرف
الزوج ........ أنا برضو اللي اتجننت وبخرف ياعيلة إستنجلينا..... بقولك إيه أنا كمان هنزل أروح الشغل ... سلام
الزوجة ....... سلام ياخويا إلهي يجعل لك في كل خطوة كعبلة
(وهنا يتكعبل الزوج أثناء خروجة من الشقة للكواليس
الزوجة ....... يلا بالشفا (وينتهي المشعد الثاني)
(((( المشهد الثالث ))))
وننتقل الى المشهد الثالث في عيادة الدكتور بدخول التمرجي ويدعى هلاوس وهو يقول للدكتور بعد أن يحيي الجمهور
التمرجي ........ المريض اللي برة يادكنور أول واحد في الكشف عاملي فيها الريس حنفي شيخ الصيادين ولسة نازل من القطر حالا ومستعجل وعايز يروح بلده بسرعة
الدكتور ........ مش فاهم يعني ايه عامل فيها شيخ الصيادين
التمرجي ...... يعني لابسلي صديري وراسم وشم الهلب على كتفه وبيرطن بالسواحلي
الدكتور .......سواحلي سواحلي وانا يهمني ....اللي يقرب جنب سواحلي أخلي ليلته كحلي
التمرجي ....ينادي على المريض ... أدخل ياريس ... وخلي بالك الموج عالي
( وهنا يدخل المريض السواحلي يرقص ويتحنجل مثل صيادين اوبريت الحلوة لسة صغيرة وعلى نفس الوسيقى )
بختك يابو بخيت .... الهمة ياجدعان .... هزوا الشبكة ولموا .... خلوا الرزق يبان ....
( وهنا يدخل الدكتور مقلدا غناء وأداء الصياد ) .....صبرك حبة ياخال رزق الغيب دا حلال.... يجي بطولة البال ...مش عايز شيال ولا محتاج خيال يجري وراه بحصان .... بختك يابو بخيت
( وهنا يدخل التمرجي راقصا بتمايل مقلدا سعاد حسني ... يابحر الهوي ياحبيبي أنا ... أنا كنت عايزة أجيلك بقالي كام سنة .... بيقولوا إنك قوي وبتجرح بالقوي ... علمني علمني بس حاسب عليا من الهوى يابحر الهوي ياحبيبي أنا
وبعد الرقصة يحيوا الجمهور ثم يقول المريض الصياد للدكتور باللهجة السواحلية )
المريض .... 100 مسا يا معلمي
الدكتور ....... ياعيون معلمك 100 مسا ياسيدي ... أهلا وسهلا إتفضل
المريض ....... يذيد فضلك...... أو بنقص.... مش مشكلتي
الدكتور ...... أه طبعا مش مشكلتك دي مشكلة أمي أنا.. إسمك إيه ياريس ..... والمهنة طبعا واضحة صياد مش كدا؟
المريض ...... صياد إيه يا دكتور أنا الريس حميدو شيخ الصيادين الريس حميدو اللي حط صباعه تحت القطر. عدله
إسأل عني الحيتان والقروش يقولولك حميدو ... تسلم إيده
الدكتور ....... هو مش أبو العربي هو اللي حط صباعه تحت القطر ... قلبه .....إنتو هتشتغلونا
المريض ....... أيوة هو يادكتور ... وانا بقا اللي حطيت صباعي تحته عدلته... أبو العربي حبيبي مايخلصنيش يروح في س و ج
الدكتور.......طيب ياسيدي تسلم صوابعكو اللي عماله تشقلبلنا في القطارات .... أفهم من كدا إن إسمك حميدو
المريض .... أيوة يادكتور ... أنا البحر في أحشائه الدر ... أنت بقى فيه إيه في أحشاءك ؟
الدكتور ......أنا في أحشائي مسقعة يابني .... ياعم سيبك مني ومن أحشائي وعرفنا خلاص إن إنت السندباد البحري
والقروش والحيتان بتضربلك تعظيم سلام ممكن تقوللي بقا بتشتكي من إيه ؟
المريض ..... بشتكي من زمايلي الصيادين يادكتور
الدكتور ....... ليه عملو لك إيه ؟
المريض ..... بعد ماكانو بينادوني الريس حميدو بقوا ينادوني الريس ميدو ... واللي ينونولي واللي يبسبسلي
وبيضحكو ويتمألسو عليا في الرايحة والجاية وكل دا عشان
إصطدت فى يوم انا بلطية
بلطية عفية إنما هى
بلطية تشوفها يادكتور
فشر الميّاسة البحرية
إحترت انا أعمل إيه فيها
أشويها ولا أقليها
ياسلام ع السمكة المشوية
ياسلام لو كانت مخلية
مع نص لمونة تحليها
وشوية سلطة مع الفلفل
وكمان طبيقين رز مفلفل
شمر فى إكمامك وإديها
وفى غمضة عين نطت قطة
ع السمكة إنما حتة نطة
وخطفت مني السمكاية
من بعد مارسمت فى الخطة
وبقيت غنيوة انا وحكاية
يحكوها سهارى فى سهراية
كل ماعدّي انا جنبيهم
يضحكوا ويعلوا الضحكاية
ويغنوا الغنوة المشهورة
من بعد مابان فى البنورة
صياد البحر المتعافي
قال وشم الهلب على كتافي
مبخافش من الحوت والقرش
وأخاف من قطة صغيورة
كده برضوا ياقطة ياحرامية
خليتي الناس المرازية
يلاغوني بلغوة ماهيش هى
تسيبيلي الرز مع السلطة
وتأزأزي إنتي البلطية
الدكتور ,,,, أيوة خلاص خلاص فهمت يعني القطة عملت معاك الجلاشة هههههههه طب قوللي
هل فيه عداء مسبق بينك وبين القطة ...دوست على ديلها وانت ماشي مثلا أو راودتها عن نفسها في لحظة طيش
المريض ... قصدك إيه يادكتور مش فاهم
الدكتور .... لا أبدا أقصد هل مرة كدا وبحسن نية طبطبت على ضهرها أو ملست على شعرها وهي فهمت قصدك غلط
المريض .... لأ طبعا يادكتور محصلش هو أنا برضو هتحرش بقطة
الدكتور .......طب ممكن مثلا تكون أكلت في طاجن الأكل بتاعها
المريض ...... وإيه اللي يخليني أكل في طاجن الأكل بتاعها يادكتور هو أنا مجنون
الدكتور ....... تكون الظروف أجبرتك ... وخصوصا لو كانت الظروف دي صحتها مساعداها
المريض ...... فيه إيه يادكتور مالك أجيبلك دكتور
الدكتور ......لا لا خلاص مفيش داعي ....
المريض ... المهم يادكتور بقا عندي حالة غريبة كل ماأشوف قطة أو حتى أسمع صوتها ... بتجيني هلاوس
( وهنا يدخل التمرجي هلاوس ويقول )
التمرجي .....حد بينادي عليا
المريض ..... محدش ندهلك ههههههههههه هو انت كمان عندك هلاوس
التمرجي ..... لا ياريس ميدو أنا إسمي هلاوس
المريض ...... وانت إيه عرفك حكاية ميدو ديا .... إنت بتتسنط علينا ياض ياهلفوت انت (ممسكا التمرجي من ياقته)
التمرجي ....... أبدا ياريس حميدو أنا بدلعك بس
المريض ...... وتدلعني ليه شايفني كريم إبن أختك ..... إسمع يابقف إنت .. إنت تخليك في كوزك لما نعوزك انت فاهم
التمرجي ....... فاهم فاهم ياريس إعتبرني في الكوز من دلوقتي بس سيبني الله يخليك
( وهنا يتدخل الدكتور محاولا تخليص التمرجي من قبضته قائلا )
الدكتور .......حقك عليا انا ياريس حميدو
المريض .....إبعد انت يافندي ... (ويدفعه بعيدا)
عندئذ ينونو الدكتور مقلدا صوت القطة ناااااااو ناااااو فيتركه المريض وهو يهذي خائفا يتحرك يمينا ويسارا
الدكتور ..... خلاص ياريس انا مشيت القطة إهدى بقى.. ثم يوجه كلامة للتمرجي أخرج انت بسرعة أحسن أخليه ياكلك
التمرجي ..... حاضر حاضر( ويخرج مسرعا )
المريض ... شوفلي حل يادكتور إعمل معروف
الدكتور ..... أولا لازم تبني جسر الثقة والمحبة مع القطة وتقدم لها فروض الولاء والطاعة
بمعنى أصح تقدملها كل يوم سمكة تاكلها
المريض .... إزاي يادكتور .... دي إسمها إتاوة .... كدا كرامتي وهيبتي يضيعوا مني
الدكتور ....... لما كرامتك تضيع قدام القطة أحسن ماتضيع بين الصيادين ... وبكدا الصيادين هيعرفوا ان انت بتربي القطة وبتعطف عليها وهتكبر في نظرهم
المريض .....إنت شايف كدا ... ماشي يادكتور نجرب كلام البهايم .. أنا متشكر لك جدااااا سلام عليكو
الدكتور ..... بهايم .... طب مع السلامة ياميدو ( ولكن حميدو لايسمعه وهو خارج )
الدكتور .... يرن الجرس ولكن لايجيبه التمرجي فينادي عليه أنت فين ياهلاوس
التمرجي ... (يرد عليه من الخارج ) أنا في الكوز يادكتور
الدكتور ..... لأ تعالى خلاص ماتخافش ... العو مشي ..... فيه حد تاني برة
التمرجي .....أيوة فيه مريض برة ماسك صفارة
وعمال يصفر ويقول اللي نازل المحطة الجاية يحضر نفسه فاكر نفسه في الأتوبيس شوفوا يادكتور احسن صدعني
الدكتور ....طيب إهدي شوية ياهلاوس انا مش ناقص حرقة أعصاب الله يخليك ... خليه يتنيل ويخش
ويدخل المريض يحي الجمهور ثم يقول
المريض ... مساء الخير
الدكتور ... مساء النور أهلا وسهلا
المريض .... قبل أهلا وسهلا تسمحلي أسألك سؤال مهني.... حضرتك دكتور ولا بتستعبط ؟
الدكتور .....إيه بستعبط دي !!!! طبعا دكتور والشهادة متنيلة ملزوقة ع الحيط قدامك أهي
المريض .... ماتأخذنيش يادكتور أصل كل إللي حواليا بيستعبطو
الدكتور ...... ليه إنت بتشتغل إيه ؟
المريض .... أنا كمسري أتوبيس ( أتوبيس .... أتوبيس ... أوتبيس ... يكررها المريض بطريقة هيستيرية )
عمرك ركبته يادكتور ؟
الدكتور ... يعني... ركبته مرة ولا اتنين كدا وحرمت
المريض ... أه حرمت ... يبقا أكيد هتفهمني
الدكتور .......إحكيلي بس مالك
المريض ..... أحكيلك إيه ولا إيه يادكتورأنا إتجننت خلاص من الزحمة
الدكتور ....... مالها الزحمة ... عملت لك إيه ؟
المريض ...... في وسط الزحمة تلاقي اللحمة
مترطرطة قوي ع الجنبين
وديابة بشرية عيونها بتلمع
نازلين بص شمال ويمين
وإدين بتفتش في جيوب غيرها
أو في جناب ست الحلوين
وروايح هبة ترد الروح
من تحت الباط أو بيت اللوح
تهرب منها وتبعد عنها
تجري وراك مطرح ماتروح
واللي راكب على كتف الناس
واللي مركز والمنداس
والمتمرجح والمتطوّح
والمستعبط والمحتاس
والمستعجل نفسه يروّح
مايعديه إبن المستلوح
واللي بعلو الصوت بتنوح
سرقوا البوك بتاعي ياناس
( ويكررها المريض وهو خارج من العيادة سرقوا البوك بتاعي ياناس ... سرقوا البوك بتاعي ياناس )
والدكتور ينادي عليه إستني يابني ياحبيبي استنى أكتبلك علاج على ضهر التذكرة ولكن يتجاهله المريض ويمضي في طريقه
ويكلم الدكتور نفسه ويقول الله يرحمك ياما ... كان نفسك أطلع دكتور ... أديني طلعت عاجبك كدا إهئ إهئ ( يبكي)
ثم يرن الجرس للتمرجي هلاوس فيدخل عليه التمرجي وهو يأكل الفول السوداني ويسأله الدكتور
الدكتور .... إنت بتاكل إيه ياهلاوس
هلاوس التمرجي .... دا سوداني يادكتور بقشيش من المريض اللي برة
الدكتور .... سوداني .... طب هات واحدة ياهلاوس أنا حبيبك
التمرجي ....إنت هتبص لي في رزقي كمان مش كفاية كل ماأحيب سندوتش تاكله مني
الدكتور .....خلاص خلاص مش عايز إبعتهولي ... أنا أعرف أقلب أمه
التمرجي ... حاضر يادكتور هبعته بس على الله هو اللي مايقلبكش
المريض .... مساء الخير يادكتور
الدكتور .....مساء الخير ... أهلا وسهلا إتفضل
المريض ... إلحقني يادكتور برج من عقلي هيطير
الدكتور .... يطير .... يطير إزاي ... الأبراج مابتطيرش .... الأبراج بتبيض
المريض .... بتقول إيه يادكتور ...مين اللي بيبيض
الدكتور ....لا لا أنا أسف سرحت في حاجة تانية ... إتفضل كمل
المريض ... أكمل إيه يادكتور يكملك بعقلك
الدكتور ... قصدي مشكلتك إيه يعني ؟ إنت إسمك إيه وبتشتغل إيه ؟
المريض .... أنا ولا مؤاخذة إسمي رامبو وبشتغل حارس في جنينة الحيوان
الدكتور .. أه دي مهنة جميلة التعامل مع الحيوانات أسهل بكتيييييير من التعامل مع البشر
المريض .... بيتهيألك يادكتورالموضوع صعب جدا وخصوصا لما بيبان الأقفاص إتفتحت وخناقات على طول
بين الحيوانات ومش عارف أسيطر عليهم ومش عارف الحق على مين
الدكتور ... طب إحكيلي وأنا أساعدك
المريض ..... بص ياسيدي ...
في حديقة الحيوان إقفاص وبيوت وبيبان
وقفص القرد المانكي بيجاور أبو قردان
وكان القرد المانكي ذو المنشأ التركي
بيغيظ ف ابو قردان و يقوله أنا قرد وجان
وأبو قردان متضايق زهقان طهقان مش طايق
عشان القرد المانكي بحمار خده بيتعايق
الدكتور ...ها ها ها ... بحمار خده برضو
المريض .... أيوة يادكتور خليها خده عشان الرقابة .... أبوس إيدك ماتلبسنيش في الحيط
الدكتور ... ها ها ها ماشي ياعم نخليها خده .. كمل
المريض ...أبو قردان نوى على نية صحي بدري من الصبحية
وإتسحب عضه ف خده وهرب إبن الجنية
وكمان بيت الضبع بيجاور بيت السبع
والضبع لأنه لئيم وتملي خسيس الطبع
قاله ياملك الغابة ياما كدا في الحبس غلابة
مين حبسك ياغضنفر ودا تغفيل ولا خيابة
هجم السبع عليه وإداله بوكسين ف عنيه
الضبع عمل فيها أرنب ووطى وباس في إيديه
الدكتور .... لآ لآ دي مشكلة بسيطة خالص
المريض .....بسيطة إزاي يادكتور فهمني .. القرد عمال يتنططلي ويقوللي ماليش دعوة خدلي حقي من أبو قردان
والضبع بيحملني المسئولية عشان ماقفلتش الباب كويس على السبع ولا قادر أسيطر عليه
الدكتور ... بص ياعم ترامبو
المريض ...ترامبو ... ترامبو مين يادكتور أنا إسمي رامبو ... هتودينا في داهية الله يخرب بيتك
الدكتور ... ههههه طب إسمع مني ياعم رامبو
خلاصة الكلام السبع هيفضل سبع برغم الحبس محدش قده
والقرد إن كان يتعايق بحمار خده يبقى عبيط يستاهل عضو
المريض ..إنت شايف كدا ياااا دكتور عجة
الدكتور ... عجة ... عجة مين ؟
المريض .... أنا أسف يادكتور أصلك بصراحة بيض قوي .. سلامة عليكو
ويخرج المريض من العيادة والدكتور يضرب كف بكف ويقول خلاص مفيش حد عاقل
ويضرب الجرس للتمرجي ويدخل هلاوس ويقول له
... أيوة يادكتور.... حضرتك صفرتلي ... قصدي يعني رنتلي الجرس
الدكتور ..... أيوة ياسيدي رنيت لك الجرس بإيدي اللي عايزة قطعها دي
التمرجي ...... كله على الله يادكتور ... أأمر
الدكتور........ ألا قوللي ياهلاوس ... هو انا شغلتك عندي ليه تفتكرش؟
التمرجي ......شغلتني عندك عشان عبقريتي وألمعيتي
الدكتور .... طيب ياعم الألمعي روح هاتلي كوباية شاي وقرص بنادول
التمرجي ..... ترامادول حاضر يادكتور من عينيا دي حتبقى ليلتنا فللي هههههههههه ...... إلعبي ياألعاب
الدكتور ....... لأ فعلا ألمعي بجد تصدق .... ياحبيبي بقولك بنادول ....بنادوووول للصداع مش ترامادول
داهية تاخدك إنت ومراتي في يوم واحد
بقولك إيه ماتجيبش حاجة ..... قوللي فيه عندك حد برة تاني
التمرجي... أه فيه واحد بس اللي فاضل باين عليه البهوية قوي .... تحس كدا إنه واخد شلوت في تفسه ههههههههه
الدكتور...... عادي ماانا برضو لسه واخد شلوت في البيت قبل ماانزل ... قصدي لسه واخد مراتي جوزين إقلام قبل ماأنزل ....روح ياهلاوس دخله الله لا يسيئك
التمرجي ... يتمتم بصوت خافت أنا برضو إللي هلاوس ....حاضر يادكتور ( ويخرج التمرجي ويدخل المريض ويقول بعد أن يحي الجمهور)
المريض ... مساء الخير يادكتور
الدكتور .... مساء الخير ياسيدي إشجيني إنت كمان
المريض ... أشجيك !!! ... فيه إيه يادكتور إنت ماقابلتش ناس عاقلين قبل كدا ولا إيه ؟
الدكتور .....أنا أسف لحضرتك هيجننوني
المريض ... لا لا ألف سلامة عليك يادكتور
الدكتور ..... أأمر يافندم أي خدمة أقدر أقدمها لحضرتك
المريض ... حضرتك مش عارفني ولا إيه
الدكتور ... متهيألي شوفتك قبل كدا .. حضرتك بتطلع في التلفزيون أو السينما
المريض .... أنا الإعلامي مبتز مطر مذيع قناة الشرخ
الدكتور ...... أه أهلا وجهلا ....عندك تصوير هنا ولا إيه ؟
المريض ... لا لا أبدا أنا بعض الأصدقاء نصحوني أستشير طبيب نفسي يكتبلي شوية مهدئات
الدكتور ... مهدئات ليه خير
المريض ... أعصابي تعبانة شوية ..كنت بقدم برنامج إسمه محطة مصر وفجأه قطعوا عليا الإرسال
عشان كنت بقدم فكرة جديدة قالوا عليا حمار ..... وبعد كدا قدمت نشرة أخبارية فالوا عليا مجنون ورفدوني
الدكتور ... فكرة إيه ممكن تقولهالي
المريض ..... فكرة قلب الموازين .... قلت فيها
من جوه قناة فى محطة
برنامج حطة يا بطة
هنقدم ليكم فكرة
مع لقطة فى حلم لبكرة
شوفت القطة فى بق الفار
والعصفورة فى عينها شرار
وشوفت النمر فى عز جنانه
فى عينه الرعب وديله فى سنانه
وشوفت غزال بيطارد فهد
وشوفت الفهد بيجري بجد
والتمساح فى البركة بيجري
من قرموط النيل الغجري
وشوفت الأرنب فارد صدره
ضد الذئب فى ليلة بدره
والكتكوت إصطاد حداية
فرحان يبقول أهو جاني غدايا
وشوفت كمان إنسان الغاب
والنسانيس كاسرينله الناب
وشوفت حمار لابس كرافتة
مذيع برنامج حطة يابطة
المريض ..... فيها حاجة دي يادكتور ؟
لأ خالص ياحمار .... قصدي لأ خالص ياأستاذ دي فكرة عبيطة جدا ... قصدي فكرة جميلة إنك تقدم مستحيلات
المريض .... هتقول إيه بقا يادكتور في العقليات العقيمة
الدكتور ..... هقول إيه ههههها هههها لو قلت هقول كتير ياعم طظ
المريض ..... طظ مين يادكتور انا اسمي مبتز
الدكتور ....ياعم مافرقتش كتير صدقني وطظ دي لو نزلت عرض هتبقى طظين يعني طظ بلس شوف الهنا اللي هتبقا فيه
المهم لازم تفهم طول ماانت بتقول أكاذيب وبتزيف الحقايق ونفسك تقلب نظام الموازين هيقولوا عليك حمار
عشان الناس خلاص بقت فاهمة وواعية ومبقاش يخيل عليها الكلام دا
الدكتور ...... المهم قوللي رفدوك ليه بعد النشرة الإخبارية .... يمكن عشان بتفتف وانت بتهرتل ..
قصدي وانت بتتكلم يعني
المريض ... أبدا كل إللي عملته إني إتكلمت عن نبض الشارع وانت عارفني أنا أساسا تربية شوارع
الدكتور ....أيوة أيوة كلنا عارفينك شوارعجي... المهم قولت إيه في النشرة طمني
المريض ... أبدا يادكتور قلت سيداتي أنساتي سادتي أقدم لكم نشرة منتصف الليل الإخبارية
جانا النبأ التالي الآن
قبل ماينزل في الجرنان
أن السيد سونة العايق
كان متقريف قوي متضايق
علشان جارته الست سنية
على راسه دلقت جردل مية
أناشد من هنا ست سنية
تاخد بالها المرة الجاية
وفانا كمان مندوبنا الآن
أن سليم أفندي الفنان
الكائن برضو في نفس الحارة
محبط جدا قوي علشان
مشهور عنه رزالة صوته
وكل الناس ماعليه بيفوتوا
يقولوا أسكت حبة يافنان
والحدث الأحدث ع الإطلاق
حيث الأسطى علي السباك
شد ودان ولد إسمه نبيه
لمحته أمه من الشباك
نزلت دوغري تلطش فيه
هو يقول حرمت خلاص
هى تقوله أنا مش سيباك
هو يقول حوشوا عني ياناس
هي تقوله عاجبني قفاك
وفي آخرالنشرة يامستمعين
إذا كان لسة في ناس صاحيين
حقيقة حقولها وأطلع أجري
ياأنا مجنون ياأنتوا المجانين
الدكتور ..... بس بس بس دا انت ملك خالص هههه أبدعت وأينعت .... يعني المهم مش خدت مستحقاتك وإنت ماشي
المريض ... لأ أخدت قلمين كدا وكام شلوط ع الماشي ومن ساعتها يادكتور وانا مش عارف أقعد على حيلي
الدكتور..... وريني كدا أاااه فعلا طابت وإستوت وطلبت الأكالة
المريض .... فيه إيه يادكتور ...عيب إختشي
الدكتور ..... ياأخي إختشي إنت بقى .. عموما إنت مش محتاج أقراص مهدثة .. إنت بس محتاج علبتين لبوس عشان الشلاليت وشوية مراهم تدهن بيها خيبتك القوية
المريض ..... رأيك كدا يادكتور
الدكتور .......أيوة ياأستاذ أنا متعود على الحاجات دي
المريض ..... متعود تكتب للناس لبوس
الدكتور ....... لأ متعود على الشلاليت
وبيغنوا مع بعض) أه يانا ياتعبان يانا ... أه يانا ياموجوع يانا .... أه يانا من شلاليتهم ... شلاليتهم قوي وجعانا
أه يانا أه يانا أه يانا ... أه يانا ياموجوع يانا
يدخل هلاوس التمرجي ممسكا قفاه بعد ما يخرج الإعلامي من العيادة
الدكتور ..... إيه مالك ياهلاوس ماسك قفاك كدا ليه يابني؟
التمرجي ..... لزقوني على قفايا يادكتور
الدكتور .......مين دول يابني اللي لزقوقك على قفاك ؟
التمرجي ..... ثلاثة برة عايزين يقابلوك ... قلت لهم الكشف واحد واحد ...قالولي لأ .. لازم نخش مع بعض
قلتلهم خلاص زبطوني وانا أدخلكم مع بعض ..... راح واحد منهم مظبطني على قفايا
الدكتور ...... هاهاهاها رزقك ياهلاوس ..... هو انا برضو معقول أبص في رزقك هههه دخلهم ياسيدي
( يدخل المجانين الثلاتة اللذين ظهروا في أول المسرحية يرقصون على اسكتش احنا الثلاثة لشكوكو وشادية
وإسمعاعيل يس .... إحنا الثلاثة سكر نباتا ... إحنا الثلاتة حاجة شرباتاتا .... بالإنسانية مش بالتباتة احنا الثلاثة إحنا التلاتة
الدكتور ......... أهلا أهلا أهلا ... هو انتوا ... يامرحب يامرحب
المجانين ........ يادكتور قولنالك مش إحنا ... دا احنا التانين .... مش عايز تصدقنا ليه
الدكتور .........عموما خلاص أنا مش زعلان منكم ..... إزيك ياسي عطية بتشتكي من إيه
أكيد من أيام الأسبوع هههههههه تلاقي السبت ضايقك في حاجة أو يوم الأربع داسلك على طرف ههههههه
عطية المجنون رقم (1) ... إنت بتقول فيها يادكتور هو يوم بس نمته في الشارع صحيت لقيت الدنيا متشقلبة
السبت متنكر في شخصية الأربع ..والأربع نفسه مش مقتنع إته أربع.. أقوله ياعم صدقني إنت أربع .. يقولي لأ
أنا الخميس ... أقوله ياعم لأة خميس دا كان صول في رصيف نمرة خمسة برضو مش مصدقني
الدكتور ...... أقدر أقولك مبدئيا يوم الأربع ويوم الخميس عندهم حالة تشيزوفرانيا يعني إنفصام في الشخصية
عطية .........وأنا مالي يادكتور المهم أنا .... انا مش عارف أفوق
الدكتور ....... طب قوللي ايه اللي وصلك للحاله دي ياعطية .... إحكيلي عن اليوم اللي نمت فيه في الشارع
عطية .......في يوم ساعة عصرية
أنا قلت أناملي شوية
في جنينة وسط القلعة
نمت وغمضت عنيا
ولمّا صحيت من نومي
يومي مهوّاش يومي
والدنيا بقت مش هى
ألوانها أبيض واسود
وناسها غريبة عليا
أفندي لابس طربوش
ومعلم بالجلابية
سألت أنا إمتى وفين
جاوبوني وردوا عليا
في مصر يانور العين
عام 1900
في حارة إسمها حوش آدم
من شارع الغورية
في الحارة مشيت على طول
أتلفّت وانا مذهول
وشوفت أنا حمّام بلدي
فوق مستوقد فول
ومعمل طرشي مخلل
وصوت مبحوح بيقول
قربوا عندي شوية
هحكيلكم حكايات
عن الزناتي خليفة
وأبو زيد إبن الهلالية
جرب صندوق الدنيا
ياخدك ويلف الدنيا
ويعود بك من تاني
من غير ماتغمض ثانية
وغنوة على البيانولا
والمية في زير أو قلة
ومبيض النحاس
عمال يدعك في الحلة
وشيخ الحارة ينادي
محدش شاف ياولادي
سي محمد أفندي أمين
مطلوب لجل الجهادية
والنظرة المدّارية
من خلف المشربية
والبرقع ويّا البيشة
وزخارف شكمجية
والدُف وكودية زار
وبخور لإبن الجنية
وفجأة بدون إنذار
صحيت فتّحت عنيا
على صوت الرعد بيدوي
والمطرة ترخّ عليا
والبرق في عيني بيضوي
والبرد بيقرص فيا
سألت أنا إمتى وفين
قالوا مصر الفرعونية
ودا حلم دا ولا إتنين
ولا في رحلة أنا زمنية
لطمت على الخدين
ووقعت وأغمى عليا
أدي الحكاية كلها يادكتور من طقطق لسلامة عليكو
الدكتور .....طب مش فاكر حصلك إيه في مصر الفرعونية ؟
أصل أنا أعرف إن توت عنخ أمون كان طايش .. وممكن يكون إستغل إن انت أغمى عليك وإستفرد بيك
عموما ماتخافش ملحوقة ... إحنا هنركز على يوم التلات لأنه اليوم الوحيد اللي إنت ماذكرتوش خالص
معني كدا إنه ممكن يكون إنشق عن أيام الأسبوع وإستناك في القلعة وأول مانمت إستلمك ياحلو
عطية المجنون رقم (1) .......طب والعمل إيه يادكتور
الدكتور .... أنا هعملك جلسة كل يوم تلات لمدة شهر بس بشرط ماتقربش جنب القلعة تاني
لأن ممكن تكون انت دخلت الجنينة وشوفتها وهي قالعة فقررت تنتقم منك وطلعتك الرحلة الزمنية دي
عطية ...... جايز برضو يادكتور .......
الدكتور ......وإنت يابهلول حكايتك إيه يابتاع الشرابية
بهلول المريض رقم (2) .... انا حكايتي بسيطة قوي يادكتور أنا كنت بحب واحدة جارتنا إسمها صفية
حتة قشطة يادكتور ... المهم ... كلمتها في التليفون عشان آخد منها ميعاد وقلتلها قصيدة زجلية غزلية لوذعية
تدوب أي واحدة في الدنيا ... ورحت الميعاد يادكتور وعينك ماتشوف إلا النور لقيت إخواتها الرحالة مستنيتي
وخدت حتة علقة ماخدهاش حمار في مطلع ومن ساعتها وأنا على الحالة دي
الدكتور ..... معقولة ... مع انك بتقول إنك سمعتها قصيدة غزلية لوذعيه تدوب أي واحدة ... طب ممكن تقوللي القصيدة دي ...... يمكن أدوب في أمك
بهلول المجنون رقم (2) ..... قلتلها وبكل حنية
وحياة سوالفي وشنابي
هلبس زعبوطي أنا وشرابي
وقميصي أبو كم العنابي
والشرز الأوحد في دولابي
وأجي أقابلك ياصفية
الساعة 8 الصبحية
في جنينة الحيوان بالجيزة
تلاقيني في وسط الفسقية
وأهو منها اشوفك ياصفية
وأهومنها أبلبط في المية
وإن حد سألني حبحلق له
وأقوله مواعد سحلية
وإن برطم هقلع زعبوطي
وأتقرمط زي القرموطي
وأديلو بدماغي في دماغه
وأبصم على ضهره بشلوتي
وأطلع من وسط الفسقية
بتنقط من جسمي المية
أصرخ وأجعر وأقول
أنا غول الغابة المبلول
بهلول السيرة الهلالية
الدكتور ....... ياسلاااااااااام حتة قصيدة لوذعية فعلا ... تخلي أي واحدة في الدنيا تقلع اللي في رجليها
وتظرفك بيهم على دماغك
بهلول المجنون رقم (2) .... ليه يادكتور أنا غلطت في إيه؟
الدكتور ......... لا أبدا ماغلطتش في حاجة ... كل اللي اللي انت عملته حلفت بسوالفك وشنابك اللي هما اساسا مالهومش أي لزمة ولبست زعبوطك وشرابك اللي تلاقيك كنت شاريهم من الشرابية وطبعا لبست الشراب في دماغك والزعبوط في رجلك ورحت الميعاد على صنجة عشرة وعملتلي فيا أبو زيد الهلالي وضربتلك غطسين في الفسقية
مش كدا برضو ولا أنا غلطان
بهلول المجنون رقم (2) ..... أه بالظبط هو دا اللي حصل يادكتور
الدكتور .......عموما علاجك بسيط جدا ..... إنت تروح القلعة وتنام مطرح مانام عطية... هيجيلك توت عنخ أمون يعمل معاك الصح.... وإبقى إدعيلي بقى..... (
وإنت ياعم يابتاع ألمانيا والشانزليزية والإليزيه ..... دا انت بالذات لك معزة في قلبي ماتتوصفش
المجنون رفم (3)...... أرجو يادكتور مايكونش فيه ضغينة من ناحيتي دا انا حتى ركبتك بطة ولا انت مابتحبش البط
الدكتور...... مابحبوش إزاي ... بحبه طبعا وخصوصا الطبلة..... دا حتى فيه بطة شمال مستنياني في البيت
المجنون رقم (3) ..... بطة شمال يعني إيه يادكتور
الدكتور ......... يعني بطة ملعب ... بس ماقلتليش إنت إسمك إيه؟
المجنون رقم (3) .... إنا إسمي خليل مارشيلو
الدكتور ..... وليه سموك كدا
المجنون مارشيلو ......أصلي قضيت نص حياتي في هوليود في أمريكا
الدكتور ........ وكنت بتعمل إيه في أمريكا ياعم مارشيلو
مارشيلو ........ انا كنت بشتغل دوبلير لأكبر نجوم هوليود ..... روبرت دي نيرو وليناردو كابريو وأل باتشينو
حتى هما اللي سموني مارشيلو .... تعرف يادكتور مفيش واحد فيهم خد قلم في فيلم أنا اللي كنت باخد كل الأقلام بدالهم
الدكتور .... لأ دا انت حكايتك حكايه ..... إحكيلي بقا كدا ياحلو من الأول خالص وبالتفصيل الممل
مارشيلو ....... حكايتي بدأت في مصر يادكتور قبل ماأسافر .....
كنت أعرف بنت وهير نيم زيزي
بريتي قوي لكن صوتها معيزي
في يوم قولتلها وات دو يو ثنك
إف وي درنك إتنين حاجة فيزي
أي مين بيبسي أور سفن أب
ردت قالت يو شط أب
أر يو كريزي أنا مس زيزي
أشرب بس إتنين حاجة فيزي
أطلب لنا بوتل أوف شامبانيا
وصحن بيكاتا وباستا لازانيا
وسلطة جريك وحمام بفريك
أما الحلو تشوكليت كيك
وبعد الأكل نروح الجيم
زن ماي دارلتج جو تو سويم
رديت قولت أنا إهدي يازيزي
خايف تشربي تصبحي ديزي
وأنا فيري بور عايش على قدي
كان الود يادارلنج ودي
أجيبلك وات يو نفسك فيه
بط ماي حظ اللعنة عليه
مش عايز يجي ولو وان داي
إدفعي إنتي بليز زيس مرة
المرة الجاية أنا ول باي
الدكتور ......أه يعني إستنطعت ع البنية .... المهم هي اللي دفعت
مارشيلو ...... لأ يادكتور تفت في وشي ومشيت .... وهو دا اللي خلاني أصمم اسافر أمريكا وأثبت وجودي هناك وأرجع معايا فلوس
الدكتور ...... ها وثبت وجودك
مارشيلو ....... لأ .... قفايا هو اللي ثبت وجوده وبقا أشهر مني... لدرجة لما بعيا محدش يعبرني.. لكن قفايا لما بيتعب شوية تلاقي كل المنتجين ييجوا يزروني وجايبين معاعهم مراهم وكريمات ويقولولي قفاك غالي عندنا يامارشيو
الدكتور .... معلش يامارشيلو ماهو قفاك برضو مش قفا حد غريب يعني العملية في بيتها
مارشيلو ........أنا قلت كدا برضو لكن الحلو مايكملش ... إستغنو عني ورحلوني
الدكتور...... ليه رحلوك ليه ,,, هو قفاك قصر في حاجة ... تكون مابتصلطحوش كويس ولا حاجة
مارشيلو ..... أبدا يادكتور ماقصرش وتملي بيروح قبل ميعاد الأوردر بساعة وبكون داهنه كريم ومروقه ع الأخر عشان ما يوجع ايد نجم من نجومنا الكبار
الدكتور ..... طب إيه طيب عملت إيه فهمني
مارشيلو ... أبدا يادكتور شوفتهم مرة بيتعاركو مع بعض .... وليه وليه مسكت المايك قلت رأي أمي فيهم بصراحة
الدكتور ...... وإيه كان رأي أمك اللي جابلك الكافية دا
مارشيلو .....أبدا يادكتور انا كنت عايز أنام و كل اللي قلته إن
روبرت دي نيرو إيطاليان هيرو
ضرب ليناردو على مناخيره
رد ليناردو وقال كده برضو
ياعم روبرت أنا واد فرافيرو
رد روبرت وقاله كبرت
ياواد وعافرت بقيت فرافيرو
رد عليهم أل باتشينو
وأل باتشينو كلنا عارفينه
بالنظارة السودا بتاعته
وخصلة شعره إللي على جبينه
عيب ياخوانا أكلتوا ودانا
هيقول إيه الخلق عليكو
بعد ماكان ليكو شنة ورنة
فضحتوا بأعمالكم نفسيكو
وفجأة ظهر توم أفندي كروز
وإتنطط زي الأراجوز
وبعد مانط ياعيني النطة
إتزحلق على قشرة موز
جت ديمي مور عاشت في الدور
مدت إيدها تساعد توم
إكمن الأبعد واد أمور
جه براد بيت نطاط الحيط
الأخ أخيل بطل الحواديت
هتخيل على مين ياسي براد بيت
يابو العضلات تغلب خرتيت
دا إنت ياواد فيري ثن قوي خالص
لافيك عضلات ولا حتى مجانس
وغطاك جلدك لو شتيت
تتش وود يانجوم هوليود
ياأجدع أبطال في الأفلام
قدام الكاميرا بتبقوا أسود
في الكواليس نلاقيكو نعام
في ختامي بقولكو تهدوا شوية
أبوس على راسكم عايز أنام
الدكتور ..... لالالا حلو قوي كدا ... إتعشت وبقت زي الفل انا هسيب المهنة المعفنة دي وأرجع لشغلتي القديمة
طبال في فرقة سنية شخلع ...... ياهلاوس
التمرجي ..... أيوة يادكتور
الدكتور ...... شطب إنت ياهلاوس الورشة اللي احنا شغالين فيها دي ومن
بكرة شوفلك شغلانة تانية يابني
أو إرجع شغلتك القديمة صبي رقاصة ... أو تعالى اشتغل معايا ....سنية شخلع ماترفضليش طلب أبدا
وينسدل الستار عليهم وهما بيغنوا ويرقصوا جميعا يدوني الشايب ليه وانا وحشة ولا إيه يدوني الشايب ليه وانا وحشة ولا إيه
بقلم طارق السيد
الشخصيات ( حسب الظهور )
(1) المجانين التلائة بالشارع
(2) الدكتور النفسي
(3) زوجة الدكتور
(4) الفرارجي ( خال الزوجة)
(5) التمرجي
(6) المريض الأول ( الصياد)
(7) المريض الثاني (الكمسري)
(8) المريض الثالث (حارس حديقة الحيوان )
(9) المريض الرابع (الإعلامي)
(((( المشهد الأول ))))
يرفع الستار على 3 مجانين في الشارع يغنون
مجانين مجانين إحنا المجانين
نازلين طالعين رايحين جايين
نسأل أيها حد نقابله
معانا ولا انت مع التانين
يخاف ويقول أنا أيوة معاكو
نرد نقوله إحنا التانين
هههههههههههههههههههههههه
مجانين مجانين إحنا المجانين
ثم يظهر الدكتورينظر يمينا ويسارا ويحدث نفسه ( أنا إيه اللي جابني هنا شكلي توهت ولا إيه ... مفيش حد هنا أسأله
ثم يجد الثلاث مجانين ويتحرك أحدهم إليه وهو ألدغ اللسان وينظر إلى الدكتور بتعجب فيقول له الدكتور ....
(الدكتور) مساء الخير
المجنون رقم 1 (ألدغ) .. مساك عثلية
الدكتور ...قوللي ياحلو
المجنون ....أأمر ياعنيا
الدكتور .....إسمك إيه
المجنون ....أنا إسمي عطية
الدكتور .....ودا من إيه
المجنون ...من الملوخية
شربتها ثخنة لسعت فيا
الدكتور ....قوللي ياحلو بنص لسانك
يابو عقل أكبر منه ودانك
عايز أروح حي السبتية
المجنون .. السبتية ... السبتية
السبتية دي بعد الجمعة
أو تقريبا قبل الحد
تركب أتوبيس يوم الأربع
أو لتنين من شارع السد
(تظهر على الدكتور علامات الدهشة ويقول له إنت مجنون يابني ولا عبيط و لا حكايتك إيه ) ثم ينتقل اليه المجنون الثاني ويقوله
المجنون رقم (2)
تعالى يافندي لبهلول أفندي
دا شارب بانجو ونص براندي
عايز إيه ؟
الدكتور .... عايز أروح
المجنون...ساكن فين ؟
الدكتور .....في السبتية
المجنون رقم (2) ...تمشي كدا على طول على طول
هتوصل حي إسمه الشرابية
تشتري منه جوزين شرابات
تلبسهم على راسك ديا (ويضربه على رأسه ضربة خفيفة بطريقة هيستيرية)
وتجعر قوي قوي وتقول
عايز أروح حي السبتية
سألت عطية أنا وبهلول
وصفولي وصفة تقلوظ فيا
الدكتور ..... أنا وقعت في شلة مجانين ولا إيه
المجنون رقم (3)
سيبك منهم دول مجانين
مش واعين ولا هم فاهمين
قبل ماتسأل حد يافندي
إعرف قبلا بتسأل مين
الدكتور.... كانت المجانين هتجنني
شكلك إنت اللي هتفهمني
عايز أروح حي السبتية
إوصفلي إعمل معروف فيا
المريض ....عيني يافندي أنا هوصفهالك
بس بشرط تطول بالك
تركب أتوبيس نمرة تمانية
من موقف في ميدان ألمانيا
قدام شارع الشانزليزيه
إللي شماله قصر الإليزيه
شارع مشهور جدآ جدآ
على ناصيته فرن كلوت بيه
بعد ماتركب شاور عقلك
تلفاه تنبل بيبحلقلك
أصلا لو كان عقلك فاقلك
كان يصرخ ويقول أحيه
الدكتور ....أحيه طب هيقول ليه أحيه
علشان الشانزليزيه في ألمانيا
طب إيه يعني ماهو الإليزيه
ياكبدي عليه سكنته في ثانية
في وصفة أمك في كلوت بيه
سيبك من عقلي وفهمني
هنزل فين أنا يامجنني
المريض ..تنزل بعد الصين بمحطة
بعد ماتنزل هتلاقي بطة
تركب على ضهرها وتغني
حطة يابطة يادقن القطة
الدكتور ....يامحلى العيشة مع المجانين
أنا اللي أستاهل جالوصين طين
بسأل ناس أنا في البطيخ
حمار وحلاوة على السكين
علشان أروح حي السبتية
ألبس شرابات م الشرابية
وأنزل من أتوبيس ملاحيس
أركب بطة على الملوخية
(الدكتور يتجنن ويجري وراهم)
طب يلا ياولاد المجانين
ليلتكم سودا وزي الطين
(المجانين الثلاثة يردوا عليه أثنا هروبهم منه إلى الكواليس حتى لا يضربهم )
إهدى ياعمنا مانتش فاهم
دا احنا ياعمنا ناس تانين
الدكتور ..مجانين هنا ومجانين في العيادة أنا هلاقيها منين ولا منين تعاليلي ياما
((((المشهد الثاني)))) شقة الدكتور
ويدخل الدكتور شقتة ماسكا في يدة اليسرى حذاؤه .....متسللا ... خائفا .. محدثا نفسه
الدكتور .... يارب تكون أمنا الغولة نايمة
وحتى لو كانت نايمة ... لسانها مابينامش
عاملة زي ستات الهنود الحمر بياكلو إجوازهم
والله انا خايف تطلعلي من أي شق في الشقة زي التعبان بلسانها ال..... بلسم
(يقول كلمة بلسم لأنه رأي زوجته فجأة خارجة من المطبخ مرتدية المريلة وبيدها سكينة المطبخ قائلة له
الزوجة ...... إنت جيت يامنيل
الزوج ....... لأ لسه ماجيتش ... دا خيالي هو اللي جه وبعتني أشتريله علبة سجاير وزماني جاي
إنتي بقى مش ناوية تروحي تشتري ورقة بوستة
الزوجة ....... ورقة بوستة !!!
الزوج ......... أيوة زي أمينة
الزوجة ...... أمينة مين إنطق ... تعرفها منين .. ماأنا عارفاك عينك تزوغ على أي عرسة في الشارع
الزوج ....... ياست انا بتكلم عن شويكار في دور أمينة..
الزوجة ...... يعني كمان تعرف شويكار اللي ساكنة معاها في نفس الدور... دا انت ليلتك سودا
الزوج ....... إيه الدماغ الجزمة دي ... ياستي بقولك دا فيلم إسمه الراجل دا هيجنن أم اللي جابوني
.... وبعدين أنا عمري ماعيني زاغت على أي حد ... لا في الشارع ولا غير الشارع
الزوجة ......ليه ... عينك اللي عايزة خزأها دي مازاغتش عليا قبل الجواز
الزوج ....... لأ أنا عيني مازاغتش عليكي أنا عيني إنطست فيكي
الزوجة ......وإيه اللي خلاها تنطس ياخويا ؟
الزوج ...... حجمك ... عيني تروح يمين تلاقيكي تروح شمال تلاقيكي . حاجبة الرؤية .... ودا بنسميه في علم النفس ... العمى الحيثي
الزوجة ......وحياة خالتك ...عمى في عينك إنت وهي ..بقولك إيه .ماتوهنيش .. كنت فين ؟ رد .. ردت المية في زورك
الزوج ........ياست انتي هو لسانك دا مابيفصلش .... وررررك ,,,, ورررك .... ورررك
إيه مفيش كلمة حلوة .... شوية دلع ..... حبة رومانسية ....كل شوية كنت فين كنت فين ... ياساتر
الزوجة ......من عينيا ياحبيبي هدلق عليك جردل رومانسية وأغنيهلك كمان
الزوجة ....يامقندل ومنيل
رد وقلنا فينك
عدي علينا وميّل
وإتنيل على عينك
أه ياخيبة أملي أنا فيك
ألفبن وكسة عليك
هو الأبعد أطرش
بقالي يومين بناديك
فين مصروف البيت
فين ياللي عاملي عبيط
أجي أقولك شخلل جيبك
تتنيل وتظيط
بتودي فلوسك فين
قول فين ياغراب البين
على طول كحيان ومفلس
ظهرك محني من الدين
الزوج .... ياولية إتلمي شوية
وخفي الضغط عليا
لسانك زي المبرد
عمال يبرد فيا
وأنا عامل زي الثور
في الساقية ألف وأدور
ومغمضالي عنيا
لجل ماأشوف النور
الزوجة .... ما انا كل مابطلب حاجة
تعملي فيها خواجة
وتبرطم وتقوللي
تشيزوفرانيا وفوبيا
وماأدرك إيه مع لوبيا
فين مصروف البيت
ل هخلي انا ليلتك كوبيا
الزوج .... ياولية سكوت بقا هس
طلباتك مابتخلص
ودليل راحة بالك
تتخني إنتي وأخس
مفيش في دماغك غير
المانيكير والباديكير
ومضيعة كل فلوسي
على إيد الكوافير
يوم ماإتجوزتك كان
نور الشمس مابان
ماشوفتش يوم أنا منك
غير طولة بس لسان
يوماتي أنا بسمع نبرك
قولي مين على عيشتي أنا جابرك
ياولية إختشي وإتلمي
وخافي من ضمة قبرك
الزوجة ..... قبري أنا .... قبر يلمك ياشيخ .... عايزة فلوس عشان اجيب هدية
الزوج ....... هدية لمين ياجميلة المحيا
الزوجة .......لجارتنا الست عزيزة وجوزها عم إمام ياسبع البرمبة
الزوج ...... ليه هدية بمناسبة إيه..... هي الست عزيزة خلفت ؟
الزوجة ..... خلفت إيه ياراجل إنت دي قد أمك
الزوج ...... مالكيش دعوة بأمي ... أنا ل
بقولك أهو
الزوجة ..... ليه يعني .... أم المصرين ياخي ها ها ها
الزوج ...... (في سره) يارب ياشيخة وانتي بتضحكي تخش في زورك سحلية وتكون دنيئة .. تاكل ماتشبع
الزوجة ..... شايفاك بتبرطم .... بتقول إيه ؟
الزوج .......بقول نجيبلهم هدية ليه يعني
الزوجة ......معزومين بكرة عندهم ع الغدا ولازم نجيبلهم هدية
الزوج........ مالقتيش إلا الناس دول لأ ياستي مش هروح دي الست عزيزة دي عليها شلوط ولا ليناردو وميسي
واخدة درع الشلوت الذهبي من جامعة الشلاليت الدولية
الزوجة .....جامعة إيه ياخويا ....ودي فين دي ؟
الزوج ..... في المهندسين جنب أحمد عرابي
الزوجة .... إنت هتشتغلني ياراجل إنت .. أحمد عرابي دا في التل الكبير
الزوج ....... لأ ماهو رجع م التل من أسبوع كدا
الزوجة ...... و رجع ليه بقا يابو العريف ؟
الزوج ........... رجع لما لقى التل إختل
الزوجة ........ والله ماحد إختل غيرك يابعيد ... إنطق ... خايف من شلاليت الست عزيزة ليه
الزوج ............إنتي ماتعرفيش عملوا ايه في اخر عزومة ليهم
الزوجة ........ عملوا إيه إنطق ... إلهي تقع ماتنطق
عزموا ياعيني سعيد بيومي
على ملوخية وعلى ديك رومي
عم سعيد قلع الجلابية
في غمضة عين إبن الجنية
وإتمطع وضرب غطسين
وإتشقلب جوة الملوخية
وطلع المدعو سعيد بيومي
من الملوخية نهش في الرومي
قام سي إمام وقال دا كلام
الضرب في ميت يبقى حرام
ضحك بيومي وأرخى في جفنو
وقال إكرام الميت دفنو
قامت الست عزيزة م القعدة
إديتلو قوام بوكسين في المعدة
وجوز إقلام مع كام شلوت
وقالتله تحلي بدولا ياسعدة
الزوجة ...... يستاهل دا راجل طفس ... هبر الديك الرومي لوحده .. والمثل بيقول يابخت من زار وخف
الزوج ........ طب ماتيجي إحنا نخف خالص ومانروحش من أصله
الزوجة ........ياراجل إنت عايز تجنني ... بقولك لازم نروح .... إنت عايزهم ياكلوا وشي
الزوج ( في سره) ..... يارب ياشيخة ياكلوا وشك وانا ادعيلهم بالهنا والشفا ..ومطرح مايسري يمري
الزوجة .... بتبرطم بتقول إيه
الزوج .......أبدا ياحبيبتي بقول حاضر من عينيا
ممكن تغديني بقا عشان ألحق أناملي شوية وأصحى أروح العيادة عندي شغل كتير
الزوجة ... همك على بطنك ...أستنى لما اجيبلك طاجن المسقعة
الزوج (يحدث نفسه) ... مسقعة ... يعني بتنجان ... أنا هلاقيها منين ولا منين بتنجان في البيت وبتنجان في العيادة
حاسس إن مخي هيبزر
(تدخل الزوجة معاها صينية عليها طاجن مسقعة وخبز)
الزوج .....إستني إستني أنا بشبة على الطاجن دا ...مش دا الطاجن اللي بتأكلي فيه القطة
الزوجة .... أيوة هو .... المواعين كلها وسخة .... أعملك ايه ... هاتلي خدامة فلبينية
الزوج .... لأ أكل في طاجن القطة ورجلي فوق رقبتي
الزوجة ..... عايز حاجة تاني
الزوج ...._ ينونو) ناااااو .... نااااو
(يرن جرس الباب)
الزوجة ......قوم شوف مين ع الباب
الزوج ...... انتي مش شايفاني باكل ياست إنتي
الزوجة ...... بقولك قوم بدل ماجي ألبسك طاجن المسقعة في دماغك
الزوج ....... إلهي يلبسك جن ياشيخة ويكون عبيط يلزقك على قفاكي كل خمس دقايق...... أيوة ياللي بترن الجرس متسربع على إيه ...داخل الجنة ياخي
الزوجة ...... مين ع الباب يامدهول
الزوج ....... دا خالك المعلم بشندي الفرارجي ...... إتفضل يامعلم
الزوجة ...... خالو إزيك واحشني ياخالو
الزوج ....... يتمتم بصوت خافت .. خالو أه خالو تقولش البت خريجة الميرديديه وخالها دا يبقى سعادة كاظم بيه
الفرارجي .... إزيك يابنت أختي وحشاني ... أخبارك إيه وعاملة إيه مع النطع جوزك
الزوج ...... محدثا نفسه والله ماشوفت أنطع منك يابغل ... عيلة معفنة طالعين من صفيحة زبالة واحدة
الفرارجي ......بتقول حاجة ياسي لفندي
الزوج ......... لأ يامعلم بقول نورت
الزوجة ....... إيه ياخالو اللي انت جايبه معاك دا .... إنت جاي بيت حد غريب ... ليه تكلف نفسك بس
الفرارجي .... ولا تكاليف ولا حاجة دول ديك وبطة يستاهلو الدبح قلوا أدبهم ... حلفت 100 يمين ماهم قاعدين عندي
ولا دقيقة ...خديهم انتي حلال عليكي بالهنا والشفا
الزوجة ...... ربنا يخليك ليا ياخالو ... أخش بقى أعملك كوباية شاي من اللي هيا
الزوج ....... خير يامعلم قلو أدبهم عليك ولا إيه
الفرارجي ... يستجروا ... ماعاش ولا كان اللي يقل أدبه على المعلم بشندي أكبر فرارجي في المنطقة كلها
الزوج......... أمال قلو أدبهم إزاي يعني ؟
الفرارجي .....إستلطخوني يالطخ
الزوج ......( محدثا نفسه ) وبعدين بقى في الراجل اللي عايز 100جزمة على دماغه دا
الفرارجي ..... بتقول إيه ياجدع انت .....علي صوتك
الزوج .. أبدا يامعلم بقولك أحكيلي إيه اللي حصل انت عارف ان أنا طبيب نفسي وأقدر أعرف وأحلل دوافعهم كويس
الفرارجي ..... تحلل إيه ..... دوافعهم هاهاها إنت بكتيره تحللهم بول وبراز هاهاها .... إنت مابتضحكش ليه مستبوخ كلامي ولا يكونش دمي تقيل على قلبك .... إنطق ماتفورش دمي
الزوج ....... أبدا يامعلم دا انت دمك زي العسل حتى بص هاهاها ..هاهاها
الفرارجي .... أيوة كدا .... عالم تخاف ماتختشيش
خلاص هحكيلك حكاية دكر البط
وبطة شمال مع ديك منحط
دكر البط إتشال وإتحط
وفط ونط من الشباك
علشان شاف البطة بتاعته
في حضن الديك أبو ست إوراك
بعد مانط وقع وإنبط
وهات ياصراخ كاك كاك كاك
ياديك العشة يابو عضام هشة
يانافش ريشك هنا وهناك
بكرة تلاقي ياديك 100 ديك
يدوك قلمين على أم قفاك
وإنتي يابطة ياخاينة العشرة
بكرة هلاقي بدالك عشرة
إتغندرتي وهزيتي ديلك
خليتي ديك العشة يجيلك
في لحظة طيش قلعتي الريش
وقلتي تعالى ياديكي نعيش
بعتي ياخاينة الغالي رخيص
لما طاوعتي كلام إبليس
جيبتي يابطة العار للبط
علشان ديك سافل منحط
الزوج ..... لأ يستاهلو الدبح فعلا ... وخصوصا ان البطة كانت قالعة ريشها .. يعني حالة تلبس
الفرارجي .... أه تلبس .. ومن ساعتها دكر البط عنده حالة إكتئاب وعمال يكاكي ... حالته تقطع القلب
أروح أنا بقا أجيبله اتنين بيره ... يمكن يفك .... سلام
الزوج ..... طب والشاي يامعلم ... يامعلم ... يلا في داهية إلهي دكر البط يسكر ويرزعك بإزازتين البيرة في دماغك
الزوجة ...... إيه دا ....هو خالو راح فين ؟
الزوج ...... وصل لخمارة يني يجيب إزازتين بيرة لدكر البط عشان عنده إكتئاب
الزوجة ...... إنت إتجننت ياراجل إنت .... إنت بتخرف
الزوج ........ أنا برضو اللي اتجننت وبخرف ياعيلة إستنجلينا..... بقولك إيه أنا كمان هنزل أروح الشغل ... سلام
الزوجة ....... سلام ياخويا إلهي يجعل لك في كل خطوة كعبلة
(وهنا يتكعبل الزوج أثناء خروجة من الشقة للكواليس
الزوجة ....... يلا بالشفا (وينتهي المشعد الثاني)
(((( المشهد الثالث ))))
وننتقل الى المشهد الثالث في عيادة الدكتور بدخول التمرجي ويدعى هلاوس وهو يقول للدكتور بعد أن يحيي الجمهور
التمرجي ........ المريض اللي برة يادكنور أول واحد في الكشف عاملي فيها الريس حنفي شيخ الصيادين ولسة نازل من القطر حالا ومستعجل وعايز يروح بلده بسرعة
الدكتور ........ مش فاهم يعني ايه عامل فيها شيخ الصيادين
التمرجي ...... يعني لابسلي صديري وراسم وشم الهلب على كتفه وبيرطن بالسواحلي
الدكتور .......سواحلي سواحلي وانا يهمني ....اللي يقرب جنب سواحلي أخلي ليلته كحلي
التمرجي ....ينادي على المريض ... أدخل ياريس ... وخلي بالك الموج عالي
( وهنا يدخل المريض السواحلي يرقص ويتحنجل مثل صيادين اوبريت الحلوة لسة صغيرة وعلى نفس الوسيقى )
بختك يابو بخيت .... الهمة ياجدعان .... هزوا الشبكة ولموا .... خلوا الرزق يبان ....
( وهنا يدخل الدكتور مقلدا غناء وأداء الصياد ) .....صبرك حبة ياخال رزق الغيب دا حلال.... يجي بطولة البال ...مش عايز شيال ولا محتاج خيال يجري وراه بحصان .... بختك يابو بخيت
( وهنا يدخل التمرجي راقصا بتمايل مقلدا سعاد حسني ... يابحر الهوي ياحبيبي أنا ... أنا كنت عايزة أجيلك بقالي كام سنة .... بيقولوا إنك قوي وبتجرح بالقوي ... علمني علمني بس حاسب عليا من الهوى يابحر الهوي ياحبيبي أنا
وبعد الرقصة يحيوا الجمهور ثم يقول المريض الصياد للدكتور باللهجة السواحلية )
المريض .... 100 مسا يا معلمي
الدكتور ....... ياعيون معلمك 100 مسا ياسيدي ... أهلا وسهلا إتفضل
المريض ....... يذيد فضلك...... أو بنقص.... مش مشكلتي
الدكتور ...... أه طبعا مش مشكلتك دي مشكلة أمي أنا.. إسمك إيه ياريس ..... والمهنة طبعا واضحة صياد مش كدا؟
المريض ...... صياد إيه يا دكتور أنا الريس حميدو شيخ الصيادين الريس حميدو اللي حط صباعه تحت القطر. عدله
إسأل عني الحيتان والقروش يقولولك حميدو ... تسلم إيده
الدكتور ....... هو مش أبو العربي هو اللي حط صباعه تحت القطر ... قلبه .....إنتو هتشتغلونا
المريض ....... أيوة هو يادكتور ... وانا بقا اللي حطيت صباعي تحته عدلته... أبو العربي حبيبي مايخلصنيش يروح في س و ج
الدكتور.......طيب ياسيدي تسلم صوابعكو اللي عماله تشقلبلنا في القطارات .... أفهم من كدا إن إسمك حميدو
المريض .... أيوة يادكتور ... أنا البحر في أحشائه الدر ... أنت بقى فيه إيه في أحشاءك ؟
الدكتور ......أنا في أحشائي مسقعة يابني .... ياعم سيبك مني ومن أحشائي وعرفنا خلاص إن إنت السندباد البحري
والقروش والحيتان بتضربلك تعظيم سلام ممكن تقوللي بقا بتشتكي من إيه ؟
المريض ..... بشتكي من زمايلي الصيادين يادكتور
الدكتور ....... ليه عملو لك إيه ؟
المريض ..... بعد ماكانو بينادوني الريس حميدو بقوا ينادوني الريس ميدو ... واللي ينونولي واللي يبسبسلي
وبيضحكو ويتمألسو عليا في الرايحة والجاية وكل دا عشان
إصطدت فى يوم انا بلطية
بلطية عفية إنما هى
بلطية تشوفها يادكتور
فشر الميّاسة البحرية
إحترت انا أعمل إيه فيها
أشويها ولا أقليها
ياسلام ع السمكة المشوية
ياسلام لو كانت مخلية
مع نص لمونة تحليها
وشوية سلطة مع الفلفل
وكمان طبيقين رز مفلفل
شمر فى إكمامك وإديها
وفى غمضة عين نطت قطة
ع السمكة إنما حتة نطة
وخطفت مني السمكاية
من بعد مارسمت فى الخطة
وبقيت غنيوة انا وحكاية
يحكوها سهارى فى سهراية
كل ماعدّي انا جنبيهم
يضحكوا ويعلوا الضحكاية
ويغنوا الغنوة المشهورة
من بعد مابان فى البنورة
صياد البحر المتعافي
قال وشم الهلب على كتافي
مبخافش من الحوت والقرش
وأخاف من قطة صغيورة
كده برضوا ياقطة ياحرامية
خليتي الناس المرازية
يلاغوني بلغوة ماهيش هى
تسيبيلي الرز مع السلطة
وتأزأزي إنتي البلطية
الدكتور ,,,, أيوة خلاص خلاص فهمت يعني القطة عملت معاك الجلاشة هههههههه طب قوللي
هل فيه عداء مسبق بينك وبين القطة ...دوست على ديلها وانت ماشي مثلا أو راودتها عن نفسها في لحظة طيش
المريض ... قصدك إيه يادكتور مش فاهم
الدكتور .... لا أبدا أقصد هل مرة كدا وبحسن نية طبطبت على ضهرها أو ملست على شعرها وهي فهمت قصدك غلط
المريض .... لأ طبعا يادكتور محصلش هو أنا برضو هتحرش بقطة
الدكتور .......طب ممكن مثلا تكون أكلت في طاجن الأكل بتاعها
المريض ...... وإيه اللي يخليني أكل في طاجن الأكل بتاعها يادكتور هو أنا مجنون
الدكتور ....... تكون الظروف أجبرتك ... وخصوصا لو كانت الظروف دي صحتها مساعداها
المريض ...... فيه إيه يادكتور مالك أجيبلك دكتور
الدكتور ......لا لا خلاص مفيش داعي ....
المريض ... المهم يادكتور بقا عندي حالة غريبة كل ماأشوف قطة أو حتى أسمع صوتها ... بتجيني هلاوس
( وهنا يدخل التمرجي هلاوس ويقول )
التمرجي .....حد بينادي عليا
المريض ..... محدش ندهلك ههههههههههه هو انت كمان عندك هلاوس
التمرجي ..... لا ياريس ميدو أنا إسمي هلاوس
المريض ...... وانت إيه عرفك حكاية ميدو ديا .... إنت بتتسنط علينا ياض ياهلفوت انت (ممسكا التمرجي من ياقته)
التمرجي ....... أبدا ياريس حميدو أنا بدلعك بس
المريض ...... وتدلعني ليه شايفني كريم إبن أختك ..... إسمع يابقف إنت .. إنت تخليك في كوزك لما نعوزك انت فاهم
التمرجي ....... فاهم فاهم ياريس إعتبرني في الكوز من دلوقتي بس سيبني الله يخليك
( وهنا يتدخل الدكتور محاولا تخليص التمرجي من قبضته قائلا )
الدكتور .......حقك عليا انا ياريس حميدو
المريض .....إبعد انت يافندي ... (ويدفعه بعيدا)
عندئذ ينونو الدكتور مقلدا صوت القطة ناااااااو ناااااو فيتركه المريض وهو يهذي خائفا يتحرك يمينا ويسارا
الدكتور ..... خلاص ياريس انا مشيت القطة إهدى بقى.. ثم يوجه كلامة للتمرجي أخرج انت بسرعة أحسن أخليه ياكلك
التمرجي ..... حاضر حاضر( ويخرج مسرعا )
المريض ... شوفلي حل يادكتور إعمل معروف
الدكتور ..... أولا لازم تبني جسر الثقة والمحبة مع القطة وتقدم لها فروض الولاء والطاعة
بمعنى أصح تقدملها كل يوم سمكة تاكلها
المريض .... إزاي يادكتور .... دي إسمها إتاوة .... كدا كرامتي وهيبتي يضيعوا مني
الدكتور ....... لما كرامتك تضيع قدام القطة أحسن ماتضيع بين الصيادين ... وبكدا الصيادين هيعرفوا ان انت بتربي القطة وبتعطف عليها وهتكبر في نظرهم
المريض .....إنت شايف كدا ... ماشي يادكتور نجرب كلام البهايم .. أنا متشكر لك جدااااا سلام عليكو
الدكتور ..... بهايم .... طب مع السلامة ياميدو ( ولكن حميدو لايسمعه وهو خارج )
الدكتور .... يرن الجرس ولكن لايجيبه التمرجي فينادي عليه أنت فين ياهلاوس
التمرجي ... (يرد عليه من الخارج ) أنا في الكوز يادكتور
الدكتور ..... لأ تعالى خلاص ماتخافش ... العو مشي ..... فيه حد تاني برة
التمرجي .....أيوة فيه مريض برة ماسك صفارة
وعمال يصفر ويقول اللي نازل المحطة الجاية يحضر نفسه فاكر نفسه في الأتوبيس شوفوا يادكتور احسن صدعني
الدكتور ....طيب إهدي شوية ياهلاوس انا مش ناقص حرقة أعصاب الله يخليك ... خليه يتنيل ويخش
ويدخل المريض يحي الجمهور ثم يقول
المريض ... مساء الخير
الدكتور ... مساء النور أهلا وسهلا
المريض .... قبل أهلا وسهلا تسمحلي أسألك سؤال مهني.... حضرتك دكتور ولا بتستعبط ؟
الدكتور .....إيه بستعبط دي !!!! طبعا دكتور والشهادة متنيلة ملزوقة ع الحيط قدامك أهي
المريض .... ماتأخذنيش يادكتور أصل كل إللي حواليا بيستعبطو
الدكتور ...... ليه إنت بتشتغل إيه ؟
المريض .... أنا كمسري أتوبيس ( أتوبيس .... أتوبيس ... أوتبيس ... يكررها المريض بطريقة هيستيرية )
عمرك ركبته يادكتور ؟
الدكتور ... يعني... ركبته مرة ولا اتنين كدا وحرمت
المريض ... أه حرمت ... يبقا أكيد هتفهمني
الدكتور .......إحكيلي بس مالك
المريض ..... أحكيلك إيه ولا إيه يادكتورأنا إتجننت خلاص من الزحمة
الدكتور ....... مالها الزحمة ... عملت لك إيه ؟
المريض ...... في وسط الزحمة تلاقي اللحمة
مترطرطة قوي ع الجنبين
وديابة بشرية عيونها بتلمع
نازلين بص شمال ويمين
وإدين بتفتش في جيوب غيرها
أو في جناب ست الحلوين
وروايح هبة ترد الروح
من تحت الباط أو بيت اللوح
تهرب منها وتبعد عنها
تجري وراك مطرح ماتروح
واللي راكب على كتف الناس
واللي مركز والمنداس
والمتمرجح والمتطوّح
والمستعبط والمحتاس
والمستعجل نفسه يروّح
مايعديه إبن المستلوح
واللي بعلو الصوت بتنوح
سرقوا البوك بتاعي ياناس
( ويكررها المريض وهو خارج من العيادة سرقوا البوك بتاعي ياناس ... سرقوا البوك بتاعي ياناس )
والدكتور ينادي عليه إستني يابني ياحبيبي استنى أكتبلك علاج على ضهر التذكرة ولكن يتجاهله المريض ويمضي في طريقه
ويكلم الدكتور نفسه ويقول الله يرحمك ياما ... كان نفسك أطلع دكتور ... أديني طلعت عاجبك كدا إهئ إهئ ( يبكي)
ثم يرن الجرس للتمرجي هلاوس فيدخل عليه التمرجي وهو يأكل الفول السوداني ويسأله الدكتور
الدكتور .... إنت بتاكل إيه ياهلاوس
هلاوس التمرجي .... دا سوداني يادكتور بقشيش من المريض اللي برة
الدكتور .... سوداني .... طب هات واحدة ياهلاوس أنا حبيبك
التمرجي ....إنت هتبص لي في رزقي كمان مش كفاية كل ماأحيب سندوتش تاكله مني
الدكتور .....خلاص خلاص مش عايز إبعتهولي ... أنا أعرف أقلب أمه
التمرجي ... حاضر يادكتور هبعته بس على الله هو اللي مايقلبكش
المريض .... مساء الخير يادكتور
الدكتور .....مساء الخير ... أهلا وسهلا إتفضل
المريض ... إلحقني يادكتور برج من عقلي هيطير
الدكتور .... يطير .... يطير إزاي ... الأبراج مابتطيرش .... الأبراج بتبيض
المريض .... بتقول إيه يادكتور ...مين اللي بيبيض
الدكتور ....لا لا أنا أسف سرحت في حاجة تانية ... إتفضل كمل
المريض ... أكمل إيه يادكتور يكملك بعقلك
الدكتور ... قصدي مشكلتك إيه يعني ؟ إنت إسمك إيه وبتشتغل إيه ؟
المريض .... أنا ولا مؤاخذة إسمي رامبو وبشتغل حارس في جنينة الحيوان
الدكتور .. أه دي مهنة جميلة التعامل مع الحيوانات أسهل بكتيييييير من التعامل مع البشر
المريض .... بيتهيألك يادكتورالموضوع صعب جدا وخصوصا لما بيبان الأقفاص إتفتحت وخناقات على طول
بين الحيوانات ومش عارف أسيطر عليهم ومش عارف الحق على مين
الدكتور ... طب إحكيلي وأنا أساعدك
المريض ..... بص ياسيدي ...
في حديقة الحيوان إقفاص وبيوت وبيبان
وقفص القرد المانكي بيجاور أبو قردان
وكان القرد المانكي ذو المنشأ التركي
بيغيظ ف ابو قردان و يقوله أنا قرد وجان
وأبو قردان متضايق زهقان طهقان مش طايق
عشان القرد المانكي بحمار خده بيتعايق
الدكتور ...ها ها ها ... بحمار خده برضو
المريض .... أيوة يادكتور خليها خده عشان الرقابة .... أبوس إيدك ماتلبسنيش في الحيط
الدكتور ... ها ها ها ماشي ياعم نخليها خده .. كمل
المريض ...أبو قردان نوى على نية صحي بدري من الصبحية
وإتسحب عضه ف خده وهرب إبن الجنية
وكمان بيت الضبع بيجاور بيت السبع
والضبع لأنه لئيم وتملي خسيس الطبع
قاله ياملك الغابة ياما كدا في الحبس غلابة
مين حبسك ياغضنفر ودا تغفيل ولا خيابة
هجم السبع عليه وإداله بوكسين ف عنيه
الضبع عمل فيها أرنب ووطى وباس في إيديه
الدكتور .... لآ لآ دي مشكلة بسيطة خالص
المريض .....بسيطة إزاي يادكتور فهمني .. القرد عمال يتنططلي ويقوللي ماليش دعوة خدلي حقي من أبو قردان
والضبع بيحملني المسئولية عشان ماقفلتش الباب كويس على السبع ولا قادر أسيطر عليه
الدكتور ... بص ياعم ترامبو
المريض ...ترامبو ... ترامبو مين يادكتور أنا إسمي رامبو ... هتودينا في داهية الله يخرب بيتك
الدكتور ... ههههه طب إسمع مني ياعم رامبو
خلاصة الكلام السبع هيفضل سبع برغم الحبس محدش قده
والقرد إن كان يتعايق بحمار خده يبقى عبيط يستاهل عضو
المريض ..إنت شايف كدا ياااا دكتور عجة
الدكتور ... عجة ... عجة مين ؟
المريض .... أنا أسف يادكتور أصلك بصراحة بيض قوي .. سلامة عليكو
ويخرج المريض من العيادة والدكتور يضرب كف بكف ويقول خلاص مفيش حد عاقل
ويضرب الجرس للتمرجي ويدخل هلاوس ويقول له
... أيوة يادكتور.... حضرتك صفرتلي ... قصدي يعني رنتلي الجرس
الدكتور ..... أيوة ياسيدي رنيت لك الجرس بإيدي اللي عايزة قطعها دي
التمرجي ...... كله على الله يادكتور ... أأمر
الدكتور........ ألا قوللي ياهلاوس ... هو انا شغلتك عندي ليه تفتكرش؟
التمرجي ......شغلتني عندك عشان عبقريتي وألمعيتي
الدكتور .... طيب ياعم الألمعي روح هاتلي كوباية شاي وقرص بنادول
التمرجي ..... ترامادول حاضر يادكتور من عينيا دي حتبقى ليلتنا فللي هههههههههه ...... إلعبي ياألعاب
الدكتور ....... لأ فعلا ألمعي بجد تصدق .... ياحبيبي بقولك بنادول ....بنادوووول للصداع مش ترامادول
داهية تاخدك إنت ومراتي في يوم واحد
بقولك إيه ماتجيبش حاجة ..... قوللي فيه عندك حد برة تاني
التمرجي... أه فيه واحد بس اللي فاضل باين عليه البهوية قوي .... تحس كدا إنه واخد شلوت في تفسه ههههههههه
الدكتور...... عادي ماانا برضو لسه واخد شلوت في البيت قبل ماانزل ... قصدي لسه واخد مراتي جوزين إقلام قبل ماأنزل ....روح ياهلاوس دخله الله لا يسيئك
التمرجي ... يتمتم بصوت خافت أنا برضو إللي هلاوس ....حاضر يادكتور ( ويخرج التمرجي ويدخل المريض ويقول بعد أن يحي الجمهور)
المريض ... مساء الخير يادكتور
الدكتور .... مساء الخير ياسيدي إشجيني إنت كمان
المريض ... أشجيك !!! ... فيه إيه يادكتور إنت ماقابلتش ناس عاقلين قبل كدا ولا إيه ؟
الدكتور .....أنا أسف لحضرتك هيجننوني
المريض ... لا لا ألف سلامة عليك يادكتور
الدكتور ..... أأمر يافندم أي خدمة أقدر أقدمها لحضرتك
المريض ... حضرتك مش عارفني ولا إيه
الدكتور ... متهيألي شوفتك قبل كدا .. حضرتك بتطلع في التلفزيون أو السينما
المريض .... أنا الإعلامي مبتز مطر مذيع قناة الشرخ
الدكتور ...... أه أهلا وجهلا ....عندك تصوير هنا ولا إيه ؟
المريض ... لا لا أبدا أنا بعض الأصدقاء نصحوني أستشير طبيب نفسي يكتبلي شوية مهدئات
الدكتور ... مهدئات ليه خير
المريض ... أعصابي تعبانة شوية ..كنت بقدم برنامج إسمه محطة مصر وفجأه قطعوا عليا الإرسال
عشان كنت بقدم فكرة جديدة قالوا عليا حمار ..... وبعد كدا قدمت نشرة أخبارية فالوا عليا مجنون ورفدوني
الدكتور ... فكرة إيه ممكن تقولهالي
المريض ..... فكرة قلب الموازين .... قلت فيها
من جوه قناة فى محطة
برنامج حطة يا بطة
هنقدم ليكم فكرة
مع لقطة فى حلم لبكرة
شوفت القطة فى بق الفار
والعصفورة فى عينها شرار
وشوفت النمر فى عز جنانه
فى عينه الرعب وديله فى سنانه
وشوفت غزال بيطارد فهد
وشوفت الفهد بيجري بجد
والتمساح فى البركة بيجري
من قرموط النيل الغجري
وشوفت الأرنب فارد صدره
ضد الذئب فى ليلة بدره
والكتكوت إصطاد حداية
فرحان يبقول أهو جاني غدايا
وشوفت كمان إنسان الغاب
والنسانيس كاسرينله الناب
وشوفت حمار لابس كرافتة
مذيع برنامج حطة يابطة
المريض ..... فيها حاجة دي يادكتور ؟
لأ خالص ياحمار .... قصدي لأ خالص ياأستاذ دي فكرة عبيطة جدا ... قصدي فكرة جميلة إنك تقدم مستحيلات
المريض .... هتقول إيه بقا يادكتور في العقليات العقيمة
الدكتور ..... هقول إيه ههههها هههها لو قلت هقول كتير ياعم طظ
المريض ..... طظ مين يادكتور انا اسمي مبتز
الدكتور ....ياعم مافرقتش كتير صدقني وطظ دي لو نزلت عرض هتبقى طظين يعني طظ بلس شوف الهنا اللي هتبقا فيه
المهم لازم تفهم طول ماانت بتقول أكاذيب وبتزيف الحقايق ونفسك تقلب نظام الموازين هيقولوا عليك حمار
عشان الناس خلاص بقت فاهمة وواعية ومبقاش يخيل عليها الكلام دا
الدكتور ...... المهم قوللي رفدوك ليه بعد النشرة الإخبارية .... يمكن عشان بتفتف وانت بتهرتل ..
قصدي وانت بتتكلم يعني
المريض ... أبدا كل إللي عملته إني إتكلمت عن نبض الشارع وانت عارفني أنا أساسا تربية شوارع
الدكتور ....أيوة أيوة كلنا عارفينك شوارعجي... المهم قولت إيه في النشرة طمني
المريض ... أبدا يادكتور قلت سيداتي أنساتي سادتي أقدم لكم نشرة منتصف الليل الإخبارية
جانا النبأ التالي الآن
قبل ماينزل في الجرنان
أن السيد سونة العايق
كان متقريف قوي متضايق
علشان جارته الست سنية
على راسه دلقت جردل مية
أناشد من هنا ست سنية
تاخد بالها المرة الجاية
وفانا كمان مندوبنا الآن
أن سليم أفندي الفنان
الكائن برضو في نفس الحارة
محبط جدا قوي علشان
مشهور عنه رزالة صوته
وكل الناس ماعليه بيفوتوا
يقولوا أسكت حبة يافنان
والحدث الأحدث ع الإطلاق
حيث الأسطى علي السباك
شد ودان ولد إسمه نبيه
لمحته أمه من الشباك
نزلت دوغري تلطش فيه
هو يقول حرمت خلاص
هى تقوله أنا مش سيباك
هو يقول حوشوا عني ياناس
هي تقوله عاجبني قفاك
وفي آخرالنشرة يامستمعين
إذا كان لسة في ناس صاحيين
حقيقة حقولها وأطلع أجري
ياأنا مجنون ياأنتوا المجانين
الدكتور ..... بس بس بس دا انت ملك خالص هههه أبدعت وأينعت .... يعني المهم مش خدت مستحقاتك وإنت ماشي
المريض ... لأ أخدت قلمين كدا وكام شلوط ع الماشي ومن ساعتها يادكتور وانا مش عارف أقعد على حيلي
الدكتور..... وريني كدا أاااه فعلا طابت وإستوت وطلبت الأكالة
المريض .... فيه إيه يادكتور ...عيب إختشي
الدكتور ..... ياأخي إختشي إنت بقى .. عموما إنت مش محتاج أقراص مهدثة .. إنت بس محتاج علبتين لبوس عشان الشلاليت وشوية مراهم تدهن بيها خيبتك القوية
المريض ..... رأيك كدا يادكتور
الدكتور .......أيوة ياأستاذ أنا متعود على الحاجات دي
المريض ..... متعود تكتب للناس لبوس
الدكتور ....... لأ متعود على الشلاليت
وبيغنوا مع بعض) أه يانا ياتعبان يانا ... أه يانا ياموجوع يانا .... أه يانا من شلاليتهم ... شلاليتهم قوي وجعانا
أه يانا أه يانا أه يانا ... أه يانا ياموجوع يانا
يدخل هلاوس التمرجي ممسكا قفاه بعد ما يخرج الإعلامي من العيادة
الدكتور ..... إيه مالك ياهلاوس ماسك قفاك كدا ليه يابني؟
التمرجي ..... لزقوني على قفايا يادكتور
الدكتور .......مين دول يابني اللي لزقوقك على قفاك ؟
التمرجي ..... ثلاثة برة عايزين يقابلوك ... قلت لهم الكشف واحد واحد ...قالولي لأ .. لازم نخش مع بعض
قلتلهم خلاص زبطوني وانا أدخلكم مع بعض ..... راح واحد منهم مظبطني على قفايا
الدكتور ...... هاهاهاها رزقك ياهلاوس ..... هو انا برضو معقول أبص في رزقك هههه دخلهم ياسيدي
( يدخل المجانين الثلاتة اللذين ظهروا في أول المسرحية يرقصون على اسكتش احنا الثلاثة لشكوكو وشادية
وإسمعاعيل يس .... إحنا الثلاثة سكر نباتا ... إحنا الثلاتة حاجة شرباتاتا .... بالإنسانية مش بالتباتة احنا الثلاثة إحنا التلاتة
الدكتور ......... أهلا أهلا أهلا ... هو انتوا ... يامرحب يامرحب
المجانين ........ يادكتور قولنالك مش إحنا ... دا احنا التانين .... مش عايز تصدقنا ليه
الدكتور .........عموما خلاص أنا مش زعلان منكم ..... إزيك ياسي عطية بتشتكي من إيه
أكيد من أيام الأسبوع هههههههه تلاقي السبت ضايقك في حاجة أو يوم الأربع داسلك على طرف ههههههه
عطية المجنون رقم (1) ... إنت بتقول فيها يادكتور هو يوم بس نمته في الشارع صحيت لقيت الدنيا متشقلبة
السبت متنكر في شخصية الأربع ..والأربع نفسه مش مقتنع إته أربع.. أقوله ياعم صدقني إنت أربع .. يقولي لأ
أنا الخميس ... أقوله ياعم لأة خميس دا كان صول في رصيف نمرة خمسة برضو مش مصدقني
الدكتور ...... أقدر أقولك مبدئيا يوم الأربع ويوم الخميس عندهم حالة تشيزوفرانيا يعني إنفصام في الشخصية
عطية .........وأنا مالي يادكتور المهم أنا .... انا مش عارف أفوق
الدكتور ....... طب قوللي ايه اللي وصلك للحاله دي ياعطية .... إحكيلي عن اليوم اللي نمت فيه في الشارع
عطية .......في يوم ساعة عصرية
أنا قلت أناملي شوية
في جنينة وسط القلعة
نمت وغمضت عنيا
ولمّا صحيت من نومي
يومي مهوّاش يومي
والدنيا بقت مش هى
ألوانها أبيض واسود
وناسها غريبة عليا
أفندي لابس طربوش
ومعلم بالجلابية
سألت أنا إمتى وفين
جاوبوني وردوا عليا
في مصر يانور العين
عام 1900
في حارة إسمها حوش آدم
من شارع الغورية
في الحارة مشيت على طول
أتلفّت وانا مذهول
وشوفت أنا حمّام بلدي
فوق مستوقد فول
ومعمل طرشي مخلل
وصوت مبحوح بيقول
قربوا عندي شوية
هحكيلكم حكايات
عن الزناتي خليفة
وأبو زيد إبن الهلالية
جرب صندوق الدنيا
ياخدك ويلف الدنيا
ويعود بك من تاني
من غير ماتغمض ثانية
وغنوة على البيانولا
والمية في زير أو قلة
ومبيض النحاس
عمال يدعك في الحلة
وشيخ الحارة ينادي
محدش شاف ياولادي
سي محمد أفندي أمين
مطلوب لجل الجهادية
والنظرة المدّارية
من خلف المشربية
والبرقع ويّا البيشة
وزخارف شكمجية
والدُف وكودية زار
وبخور لإبن الجنية
وفجأة بدون إنذار
صحيت فتّحت عنيا
على صوت الرعد بيدوي
والمطرة ترخّ عليا
والبرق في عيني بيضوي
والبرد بيقرص فيا
سألت أنا إمتى وفين
قالوا مصر الفرعونية
ودا حلم دا ولا إتنين
ولا في رحلة أنا زمنية
لطمت على الخدين
ووقعت وأغمى عليا
أدي الحكاية كلها يادكتور من طقطق لسلامة عليكو
الدكتور .....طب مش فاكر حصلك إيه في مصر الفرعونية ؟
أصل أنا أعرف إن توت عنخ أمون كان طايش .. وممكن يكون إستغل إن انت أغمى عليك وإستفرد بيك
عموما ماتخافش ملحوقة ... إحنا هنركز على يوم التلات لأنه اليوم الوحيد اللي إنت ماذكرتوش خالص
معني كدا إنه ممكن يكون إنشق عن أيام الأسبوع وإستناك في القلعة وأول مانمت إستلمك ياحلو
عطية المجنون رقم (1) .......طب والعمل إيه يادكتور
الدكتور .... أنا هعملك جلسة كل يوم تلات لمدة شهر بس بشرط ماتقربش جنب القلعة تاني
لأن ممكن تكون انت دخلت الجنينة وشوفتها وهي قالعة فقررت تنتقم منك وطلعتك الرحلة الزمنية دي
عطية ...... جايز برضو يادكتور .......
الدكتور ......وإنت يابهلول حكايتك إيه يابتاع الشرابية
بهلول المريض رقم (2) .... انا حكايتي بسيطة قوي يادكتور أنا كنت بحب واحدة جارتنا إسمها صفية
حتة قشطة يادكتور ... المهم ... كلمتها في التليفون عشان آخد منها ميعاد وقلتلها قصيدة زجلية غزلية لوذعية
تدوب أي واحدة في الدنيا ... ورحت الميعاد يادكتور وعينك ماتشوف إلا النور لقيت إخواتها الرحالة مستنيتي
وخدت حتة علقة ماخدهاش حمار في مطلع ومن ساعتها وأنا على الحالة دي
الدكتور ..... معقولة ... مع انك بتقول إنك سمعتها قصيدة غزلية لوذعيه تدوب أي واحدة ... طب ممكن تقوللي القصيدة دي ...... يمكن أدوب في أمك
بهلول المجنون رقم (2) ..... قلتلها وبكل حنية
وحياة سوالفي وشنابي
هلبس زعبوطي أنا وشرابي
وقميصي أبو كم العنابي
والشرز الأوحد في دولابي
وأجي أقابلك ياصفية
الساعة 8 الصبحية
في جنينة الحيوان بالجيزة
تلاقيني في وسط الفسقية
وأهو منها اشوفك ياصفية
وأهومنها أبلبط في المية
وإن حد سألني حبحلق له
وأقوله مواعد سحلية
وإن برطم هقلع زعبوطي
وأتقرمط زي القرموطي
وأديلو بدماغي في دماغه
وأبصم على ضهره بشلوتي
وأطلع من وسط الفسقية
بتنقط من جسمي المية
أصرخ وأجعر وأقول
أنا غول الغابة المبلول
بهلول السيرة الهلالية
الدكتور ....... ياسلاااااااااام حتة قصيدة لوذعية فعلا ... تخلي أي واحدة في الدنيا تقلع اللي في رجليها
وتظرفك بيهم على دماغك
بهلول المجنون رقم (2) .... ليه يادكتور أنا غلطت في إيه؟
الدكتور ......... لا أبدا ماغلطتش في حاجة ... كل اللي اللي انت عملته حلفت بسوالفك وشنابك اللي هما اساسا مالهومش أي لزمة ولبست زعبوطك وشرابك اللي تلاقيك كنت شاريهم من الشرابية وطبعا لبست الشراب في دماغك والزعبوط في رجلك ورحت الميعاد على صنجة عشرة وعملتلي فيا أبو زيد الهلالي وضربتلك غطسين في الفسقية
مش كدا برضو ولا أنا غلطان
بهلول المجنون رقم (2) ..... أه بالظبط هو دا اللي حصل يادكتور
الدكتور .......عموما علاجك بسيط جدا ..... إنت تروح القلعة وتنام مطرح مانام عطية... هيجيلك توت عنخ أمون يعمل معاك الصح.... وإبقى إدعيلي بقى..... (
وإنت ياعم يابتاع ألمانيا والشانزليزية والإليزيه ..... دا انت بالذات لك معزة في قلبي ماتتوصفش
المجنون رفم (3)...... أرجو يادكتور مايكونش فيه ضغينة من ناحيتي دا انا حتى ركبتك بطة ولا انت مابتحبش البط
الدكتور...... مابحبوش إزاي ... بحبه طبعا وخصوصا الطبلة..... دا حتى فيه بطة شمال مستنياني في البيت
المجنون رقم (3) ..... بطة شمال يعني إيه يادكتور
الدكتور ......... يعني بطة ملعب ... بس ماقلتليش إنت إسمك إيه؟
المجنون رقم (3) .... إنا إسمي خليل مارشيلو
الدكتور ..... وليه سموك كدا
المجنون مارشيلو ......أصلي قضيت نص حياتي في هوليود في أمريكا
الدكتور ........ وكنت بتعمل إيه في أمريكا ياعم مارشيلو
مارشيلو ........ انا كنت بشتغل دوبلير لأكبر نجوم هوليود ..... روبرت دي نيرو وليناردو كابريو وأل باتشينو
حتى هما اللي سموني مارشيلو .... تعرف يادكتور مفيش واحد فيهم خد قلم في فيلم أنا اللي كنت باخد كل الأقلام بدالهم
الدكتور .... لأ دا انت حكايتك حكايه ..... إحكيلي بقا كدا ياحلو من الأول خالص وبالتفصيل الممل
مارشيلو ....... حكايتي بدأت في مصر يادكتور قبل ماأسافر .....
كنت أعرف بنت وهير نيم زيزي
بريتي قوي لكن صوتها معيزي
في يوم قولتلها وات دو يو ثنك
إف وي درنك إتنين حاجة فيزي
أي مين بيبسي أور سفن أب
ردت قالت يو شط أب
أر يو كريزي أنا مس زيزي
أشرب بس إتنين حاجة فيزي
أطلب لنا بوتل أوف شامبانيا
وصحن بيكاتا وباستا لازانيا
وسلطة جريك وحمام بفريك
أما الحلو تشوكليت كيك
وبعد الأكل نروح الجيم
زن ماي دارلتج جو تو سويم
رديت قولت أنا إهدي يازيزي
خايف تشربي تصبحي ديزي
وأنا فيري بور عايش على قدي
كان الود يادارلنج ودي
أجيبلك وات يو نفسك فيه
بط ماي حظ اللعنة عليه
مش عايز يجي ولو وان داي
إدفعي إنتي بليز زيس مرة
المرة الجاية أنا ول باي
الدكتور ......أه يعني إستنطعت ع البنية .... المهم هي اللي دفعت
مارشيلو ...... لأ يادكتور تفت في وشي ومشيت .... وهو دا اللي خلاني أصمم اسافر أمريكا وأثبت وجودي هناك وأرجع معايا فلوس
الدكتور ...... ها وثبت وجودك
مارشيلو ....... لأ .... قفايا هو اللي ثبت وجوده وبقا أشهر مني... لدرجة لما بعيا محدش يعبرني.. لكن قفايا لما بيتعب شوية تلاقي كل المنتجين ييجوا يزروني وجايبين معاعهم مراهم وكريمات ويقولولي قفاك غالي عندنا يامارشيو
الدكتور .... معلش يامارشيلو ماهو قفاك برضو مش قفا حد غريب يعني العملية في بيتها
مارشيلو ........أنا قلت كدا برضو لكن الحلو مايكملش ... إستغنو عني ورحلوني
الدكتور...... ليه رحلوك ليه ,,, هو قفاك قصر في حاجة ... تكون مابتصلطحوش كويس ولا حاجة
مارشيلو ..... أبدا يادكتور ماقصرش وتملي بيروح قبل ميعاد الأوردر بساعة وبكون داهنه كريم ومروقه ع الأخر عشان ما يوجع ايد نجم من نجومنا الكبار
الدكتور ..... طب إيه طيب عملت إيه فهمني
مارشيلو ... أبدا يادكتور شوفتهم مرة بيتعاركو مع بعض .... وليه وليه مسكت المايك قلت رأي أمي فيهم بصراحة
الدكتور ...... وإيه كان رأي أمك اللي جابلك الكافية دا
مارشيلو .....أبدا يادكتور انا كنت عايز أنام و كل اللي قلته إن
روبرت دي نيرو إيطاليان هيرو
ضرب ليناردو على مناخيره
رد ليناردو وقال كده برضو
ياعم روبرت أنا واد فرافيرو
رد روبرت وقاله كبرت
ياواد وعافرت بقيت فرافيرو
رد عليهم أل باتشينو
وأل باتشينو كلنا عارفينه
بالنظارة السودا بتاعته
وخصلة شعره إللي على جبينه
عيب ياخوانا أكلتوا ودانا
هيقول إيه الخلق عليكو
بعد ماكان ليكو شنة ورنة
فضحتوا بأعمالكم نفسيكو
وفجأة ظهر توم أفندي كروز
وإتنطط زي الأراجوز
وبعد مانط ياعيني النطة
إتزحلق على قشرة موز
جت ديمي مور عاشت في الدور
مدت إيدها تساعد توم
إكمن الأبعد واد أمور
جه براد بيت نطاط الحيط
الأخ أخيل بطل الحواديت
هتخيل على مين ياسي براد بيت
يابو العضلات تغلب خرتيت
دا إنت ياواد فيري ثن قوي خالص
لافيك عضلات ولا حتى مجانس
وغطاك جلدك لو شتيت
تتش وود يانجوم هوليود
ياأجدع أبطال في الأفلام
قدام الكاميرا بتبقوا أسود
في الكواليس نلاقيكو نعام
في ختامي بقولكو تهدوا شوية
أبوس على راسكم عايز أنام
الدكتور ..... لالالا حلو قوي كدا ... إتعشت وبقت زي الفل انا هسيب المهنة المعفنة دي وأرجع لشغلتي القديمة
طبال في فرقة سنية شخلع ...... ياهلاوس
التمرجي ..... أيوة يادكتور
الدكتور ...... شطب إنت ياهلاوس الورشة اللي احنا شغالين فيها دي ومن
أو إرجع شغلتك القديمة صبي رقاصة ... أو تعالى اشتغل معايا ....سنية شخلع ماترفضليش طلب أبدا
وينسدل الستار عليهم وهما بيغنوا ويرقصوا جميعا يدوني الشايب ليه وانا وحشة ولا إيه يدوني الشايب ليه وانا وحشة ولا إيه
بقلم طارق السيد
ليست هناك تعليقات:
إرسال تعليق