الشاعر الأسطورة..طارق السيد يكتب..حفلة زار..

حفلة زار
كوديا وزار ودجل وهزار
وعرف الديك وبخور ع النار
وشوال تبن وكوم برسيم
عشان الجن إللي عليه حمار
ولع شمعة وحاسب إوعى
شكل الليلة هتصبح ولعة
حجل وطبل ونط الحبل
ورقص وزمر وما في الخمر
وأمر من الشياطين الحمر
وهيصة وظيطة وخلق عبيطة
يلا نخشى نعيش اللحظة
ننط الحبل مع النطيطة
إحنا إللي دهنا الهوا دوكو
إحنا ولاد جنية ياكوكو
هتعمل فيها الشيخ كتكوت
وتقول أشتاتا أشتوت
تتمطع وتحضر جن
تطلعلنا عفريت م الخن
كل دا كله علينا مايفوت
كفاية ياخلق خبل وهبل
كفاية دا كله ياخلق دجل
لاهيجلبلكو في المحبوب
ولا  راح يعدلكو  مقلوب
شوفوا مكتوب إيه في القرآن
ماحدش بيغير مكتوب
إرضوا بقسمتكم ونصيبكو
لو مش مكتوبلكو مايصيبكو
حطوا كلامي حلق في ودانكو
ياإما خيبتكم على وكستكو
بقلم طارق السيد