الشاعرة/سامية سليمان تكتب (عصفور وبيكبر)

عصفور وبيكبر
---------------
عصفور وبيكبر
وف عشه بيفكر
سرحان ومتحير
ليه دمه يتعكر

دايما يحب الكل
فرحان بورد وفل
ع الكون تملِّي يطل
ويطير ف شمس وضل

ليه صيادين تقلقه
م اللمة بتفرقه
وم الحبيب تسرقه
والحزن بيغرقه

الكل باصص له
اللي عاوز ياكله
رغم انه مايشبعش
واللي عشان شكله

ياخده كمان يحبسه
عايزه يغنيله
ولجل ما يونسه
يوريه سواد ليله

دا السجن لو من دهب
عمره ما ح يريحه
وعنده حريته
هيه اللي ح تفرحه

سامية سليمان
أم الشعراء