الشاعر الأسطورة/طارق السيد يكتب (آه وآهين)

آه وآهين
آه من طول وعذاب سكتنا
آه م الخوف إللي مسكتنا
آه وآهين لازقين في الآه
م السم الهاري في جتتنا
آه م الصرخة الشارخة صدورنا
آه م الأتب إللي على ضهورنا
وآه م الغمة إللي على عينينا
وآه من طعم المر فى زورنا
آه من دهس الناس في الناس
آه من تنطيط النسناس
وآه من ريح الغرب الهبة
وآه م الحلاليف الأنجاس
آه من جوعنا ونشفان ريقنا
وآه م الشوك المالي طريقنا
آه ورا آه من لسع العقرب
والتعابين في شقوق مخابئنا
وآه من تخفيش الخفافيش
وآه من صوت طبل التطفيش
وآه م الحاوي إللي بيحوينا
وآه من ألضشة الألاضيش
وآه من ناس مش من طبقتنا
واكلة في قوتنا وقلة راحتنا
وآه من فار بيقرقض فينا
وأه من طوق حوالين رقبتنا
وآه م الديك النافش ريش
وآه من طربشة الطرابيش
وأه م الهم إللي بيعشقنا
وآه م الفرحة إللي مابتجيش