كتب الشاعر / رضا ابو شنب $الشاعر الحزين $

الشاعر رضا ابو شنب
قصيدة الشاعر الحزين
....................

لما جيت اكتب قصيدة
قلبي وقفني  انتباه
قالي انسي اي حاجه
لما تدخل في الصلاة
انسي اهلك ويا روحك
وافتكر بس الاله
هو بيداوي جروحك
لما تبقي في يوم معاه
داالعمل ويا الفريضة
هما دول طوق النجاة
لما جيت اكتب قصيدة
قلبي وقفني  انتباه
الحروف دايما تعاند
وتخاصمني بالسنين
وتعاتبني ليه يا شاعر
الكلام بيكون حزين
قلت ليهاغصب عني
ان قلبي يكون حزين
من اللي كان دايما يعدي
واللي عشته من سنين
واللي دايما كنت اشوفه
من الالام المجروحين
الغلا دمر جيوبنا
والغلابه مفلسين
الفقير بيعاني دايما
والغني بيموت  تخين
ياكلو من اكل الغلابه
والغلابه ياكلو طين
يسرقونا في كل حاجه
ويتهمونا في الطحين
ردي يا حروفي عليا
ياللي بتلومي الحزين
هو كان ينفع  يا ساده
ولا يبقي في شرع مين
رقصونا علي الربابه
وشحتونا  في الحسين
اكلونا للديابة
وعيشونا ميتين
خلو كل الدنيا غابة
خلو كل الناس غلابة
موتو فينا الجنين
ردي يا حروفي عليا
ياللي بتلومي الحزين
................

رضا ابو شنب
مصر