انا عندى كلام كتير
قرر انك تكون كبير في عين شريك حياتك
وده مش هيكون الا لو كنت بتتجمل له زي ما بتتجمل للناس واكتر شويه
وبتحكي له عن نجاحاتك بفخر زي ما بتفضفض له وانت بتحكي عن الاخفاقات
وكمان يشوف منك الاخلاق الحلوه والضحكه الجميله اللى مش بيشوفها
وخلى العلاقه بينكم بتدور علي احتياجاته اللي لازم تتعلم ازاي تملاه
وحدد احتياجاتك وعلمه يملاها لك انت كمان
ربنا ما يحرمكم من نظرة الحب والاعجاب من شريك الحياة
اقول لكم خلاصة الخلاصه
الخلاصة إن فيه صفتين يجب أن يتوفروا في قصة الحب بين اتنين عشان تعيش وتكبر وتنجح
اولا الشخص المحبوب يكون مالي عين حبيبه
وثانيا الشخص المحبوب يكون بيعرف يملا احتياجات حبيبه
وللعلم : أي علاقة غاب عنها أحد الشرطين دول يبقى المسأله مسألة وقت قبل ما تنتهي تماما بكسر القلوب ومن بعدها بالإنفصال
طيب أنت مطلوب منك تعمل إيه عشان تحافظ على العلاقه المهمة في حياتك ؟
أولا عشان تتحقق فيك الصفة اﻷولى اللي قلنا عنها.. ماتقبلش تكون قليل في نظر محبوبك وخلي بالك أنت بتظهر للناس الأغراب أجمل ما فيك من الأدب وخفة الدم والشياكه والإهتمام بنظافتك ومظهرك وريحتك الحلوة
المطلوب إنك تقدم نفس الشيء لمحبوبك عشان تكون كبير في عينيه زي ما أنت كبير في عيون الناس
مرفوض جداً إنك تيجي قدام المحبوب بالذات وتقلل من إعجابه بيك وتتفنن إنك تكون قليل في نظره بحجة لو مش هو اللي حيتحملني أمال مين اللي هيتحملني
أنت لو عملت كده علاقته بيك بعد ماكانت علاقة إنبهار وإعجاب حتتحول إلى علاقة قرف واحتقار وصبر على الأذي
لأن هو المسكين الوحيد اللي بيشوف منك سوء الطبع والنرفزة والصوت العالي والبوز والتكشيره والإهمال في المنظر والرائحة والنظافة الشخصية
مش معقول يبقى مطلوب منه إنه بس يكون الشخص اللي بيستقبل منك كل الطاقه السلبية بكل صورها طول الوقت
يعني مفيش مشكله إنك تخليك منطقي .. غير له شويه.. يعني شويه تفضفض له وشويه تبسطه وتطمنه وتضحك في وشه وتقوله مثلا : أنا بانسى مشاكلي معاك
مطلوب منك تبقى فاهم ان مهما كان عندك من تحديات في الحياه فالمطلوب انك تبقى مدرك لاحتياجات شريكك ومركز وتديها له بحب وعن طيب خاطر
حتقولي وأنا؟؟
أرد عليك : أنت كمان طبعا لازم شريكك يملا احتياجاتك .. مش معقول يكون كل واحد فيكم بدا في حياته الشعور بالنقص لما بقيتوا شركاء
للأسف ده الواقع اللى باشوفه
تخيل الزوجه تقول : أنا حسيت اني بعد الجواز بقيت باتطلع إلى اي حد يقدرني .. لما كنت بنت وأي حد يعاكسني في الشارع كنت بازعل جدا وامنع اي حاجه زي كده تحصل واحاول اكون جد قوي عشان ماحدش يتجرأ ويقرب مني لكن بعد الجواز بقيت اتمنى اسمع كلمه حلوه حتى لو معاكسه في الشارع لاني حسيت بجفاف المشاعر لما تزوجت .. زوجى عايش معايا مش شايفني اصلا
والزوج كمان يقول : انا طول عمري اجتماعي ومحبوب وسط الناس وقعدتي حلوه والناس بتتقرب مني .. من ساعة ما اتجوزت وانا بقيت كئيب وعصبي ونسيت يعني ايه ضحك .. ادخل البيت احس اني فقدت القدره على النطق والابتسام
ليه ده كله ؟
انت بتتزوج عشان لك احتياجات مهمه وعلاقة الزواج بس هى اللي تقدر توفرها لك .. محتاج يكون لك شريك تتونس بوجوده في حياتك وبيقول لك انك انسان عظيم وشكلك حلو ومحبوب والشريك ده بس اللي من حقه يحضنك ويطبط عليك ويغازلك
وهو المطلوب منه يكون معاك على السراء والضراء ولو محتاج دكتور يجري بيك بلهفه ولو عايز تتكلم وتفضفض يسمع لك ولو عندك خبر حلو يبقى طاير من السعاده جنبك ولو متلخبط وحاسس انك مش قادر تتكلم ياخدك في حضنه لغاية لما تهدا ويسمعك وما ينامش الا لما يتطمن عليك
ولسه عندى كلام كتير
ليست هناك تعليقات:
إرسال تعليق