كتب الشاعر/ خالد عبد المعطي $أنت وأنا $

(انت وانا)

وحدى هنا من غير عيونك
فى نفس المكان ..

نفس الشجر نفس البشر
نفس المطر بتاع زمان..

نفس الايادى مشبكة
نفس القلوب العاشقين..

نفس الايادى متكتكة
لما المطر ندا الجبين..

نفس الطريق اللى قابلتك
ياما فيه لوحدنا..

هو الطريق اللى افترقنا برضو فيه
وفيه الفراق بيضمنا..

انت وانا انت و انا..

انت وانا
كنا هنا فى نفس المكان..

كنا بنحكى كنا بنرسم
كنا بنسرق عمرنا خوف م الزمان..

كنا بنحلم والحلم يكبر
كنا الهوى كنا الحنان..

ولد صغير يشبهك
لا...بنت حلوة تشبهك

و بيت صغير فوق جزيرة لوحدنا..

ساعة المطر نجرى عليه ويضمنا..

كنا بنحلم بالحياة
والحياة انت وانا..

دار الزمان
وادى القلوب العاشقين صبحت بعيد..

قلبى الحنين تاه معاكى
و انت فى سماكى
قلبك عنيد..

لا عارف انسى يوم عيونك
ولا قادر ابدأ من جديد..

و القلب قال من المحال
ينسى حبك
لو حتى فات مليون سنة..

و الوقت فات
لكن الامل راسم حاجات لينا هنا..

راسم فى يوم تحت المطر
ترجع ايدينا لبعضها..

ننسى اللى راح وهم وجراح
ترجع قلوبنا لحبها..

و الدنيا نغير طعمها بطعم الهنا
و الحياة دى كلها تصبح لنا..

انت وانا
          انت و انا
..
#خالدعبدالمعطى