كتب الأستاذ/ محمد عبد الحميد حلقة جديدة من..انا عندي كلام و $أخلاق من الفاروق عمر $

انا عندى كلام كتير
الفاروق عمر بن الخطاب صدق عندما قال : البر شيء هين وجه بشوش ولسان لين
الفلوس والصحه والعيال رزق .. كمان الناس الكويسين رزق .. سواء اللي نرتبط بيهم او بنشتغل معاهم .. او نخلفهم .. او نصاحبهم .. ربنا يجعلهم قاعدين في قلوبنا مش عليها .. يكونوا سبب في إرتياحنا مش في تعبنا و تجريحنا
انا بحب الناس  اللي بتبقي عارفه الموقف او النكته اللي بحكيها وتعمل نفسها اول مره تسمعها عشان متكسفنيش
بحب اصحاب المحلات اللي مبيقفوش علي راسي وانا داخل اشتري لبس او اي حاجه ويسبوني اتفرج براحتي
بحب الشخص اللي وانا باتكلم معاه ميبصش في موبايله ويبص في عيني ويحسسني إنه مهتم
بحترم الشخص اللي لو قلت قدامه معلومه وسط ناس ميصممش يغلطني بغبائه
وياسلام ع الناس اللي مبتقولكش كل ما تشوفك إنت تخنت قوي ولازم تخس
وبعشق الناس اللي تشوف بنت او ولد لسه مولود ومتقولش إبنك او بنتك وحشين ليه كده
بأفرح بالفلوس اللي الاقيها منسيه في جيب البنطلون وبحب الصاحب اللي ميعاتبنيش بزياده  علي قلة سؤالي عنه
وبرتاح للبني آدم اللي يقابلني واكون ناسي اسمه وميسألنيش ويقولي : أنا مين ؟؟؟ وبقدر اوي الابن او البنت اللي مبيقللوش من  فهم امهم وابوهم لمعلومه ع الفيس والميديا عموما وبيشرحوها بهدوء من غير زهق ونفخ لانهم عارفين انهم معرفوش الفيس والتكنولوجيا غير بسبب اهاليهم اللي علموهم وصرفوا عليهم
بعز اوي الناس اللي بتقدر الموقف .. يعني مثلا تزور المريض وتديله فلوس لانها عارفه ان الفلوس احسن بالنسبه له من الجاتو والفاكهه عشان تلاجته مليانه اكل وحلويات من اللى زاروه
اما بقي الناس اللي كلامهم طبطبه دول حكايه لوحدهم .. اللي ميخوفوش الواحده من خطوة الجواز وميقللوش من كليه دخلها وديما فاتحين بكلامهم باب للخير ومنورين الدنيا في وشوش معارفهم
ولسه عندى كلام كتير