كتب الشاعر/ عبد الحميد سالم $خبير سياسي $

( خبير  سياسى  ) م /عبالحميد سالم
لو فاكر نفسك خبير  سياسى
صدقنى يصحبى تبقى عبيط
لأن سياسة الدول مصالح
عدو امبارح حليف النهاردة
ودى لعبة كراسى وبيرها غويط
***
كنا ف الملكية أجرية وعبيد
كبيرنا خولى والباشا سيد
وف الأرض سخرة وكرباج للبليد
جت ثورة يوليو بجمال العنيد
 ملكنا الأراضى ...بنى سد عالى
 وتعليم مجانى ومصانع حديد
قالوا  نكساوى وسبب البلاوى
يموتوا  ف الفقر وعيشة العبيد
*****
جه السادات بطل حرب وسلام
سياسى محنك فعل مش كلام
مقاتل وعقله كان أكبر سلاح
رجع سينا لمصر وعمل انفتاح
وف القدس صلى وقهر اسرائيل
قالوا باع القضية وأكبر عميل
قتلوه الخونة وجه مبارك بديل
*****
 مقاتل لكن عهده فساد للركب
 بس الغلابة معاه كانوا ف أمان
 كان طوع  أمريكا وتحت الطلب
ف الشرق حليفها  وعمره م خان
وبضعفه ساعدها ف تدمير العرب
وف الاخر سلم  لعز  وسوزان
قالوا نهب مليارات وسبايك دهب
*****
قامت ثورة ربيع وقلنا عمار
طلعت مؤامرة وكان هدفها حصار
وتنحى مبارك ورفض الفرار
واكتشفنا أن النخبة مجرد شعار
لبسونا ف حيطة وشوفنا المرار
ومازلنا بنعانى من سوء الاختيار
********
وعشان مصر تحيا وتطلع للأمام
لازم نتعب شوية ونشد الحزام
بلاش نبقى شعب همه أكل ومنام
وقعدة قهاوى وف الهيصة يزيط
وعامل خبير سياسى وغيره عبيط
ف فكك منها يصحبى خليك حويط
لإن السياسة ليها ناسها وبيرها غويط