كتب الشاعر/ خالد عبد المعطي #قال بيقولوا إنك أستاذ #

قال بيقولوا انك استاذ
و انا فى الحب بليده و خام.
..
و ان الشوق لعنيك ينحاز
و هيتعب قلبي سنه لقدام ..
..
طب حاصل ضرب عنيك فى عنيه
لو اطرح منه قساوتك ديه..
قولى بسرعه هيطلع كام؟..
..
وكمان قولى لو احنا جمعنا
قسمة عمرنا على اوجعنا
ايه الناتج بالارقام؟؟..
..
و كمان أعرب كلمة أحبك
لما تقولها من ورا قلبك
تقصد كانت ماضى و عدا
و لا زمانها مضارع تام.؟؟؟..
..
و قولى كمان و بكل امانه
هو املنا فى خبر كان
و اتبدل دور الميم و اللام؟؟؟؟..
..
و ارجع واحكى عن اوزوريس
و قصة حبه ويا ايزيس
و لا حكاية ليلى و قيس
كديه و حبكتها الافلام؟؟؟..
..
اشعار عنتر ا كانت جد
و حبه لعبله فاق الحد
ولا ده بحر وهم اتمد
لما غرقنا فى الاوهام؟؟..
..
صح كلامهم انك عالم
و شهادتك مضمونها القسوه
و خبير جمع مؤنث سالم
و كمان دبلومه فى نون النسوة
و ان هوانا كان و لا يسوا
و بكره تنسينى الايام؟.
بكره تنسينى الايام
..
#خالدعبدالمعطى