كتب الأستاذ/ محمد عبد الحميد حلقة جديدة من..أنا عندي كلام و $بماذا توصفون تلك المشاعر $

انا عندى كلام كتير
لما باساعد ست عجوز أو شيخ مسن علشان يقدروا يعدوا الشارع .. أو أعرف أوصف لواحد تايه عنوان بيدور عليه ومش لاقيه
لما اسقى عابر سبيل كوباية ميه ويكون باين عليه وهو بيشربها إنه عطشان قوى
لما اشيل قشرة موز من منتصف الطريق او من على الرصيف  أو قطعة زجاج مدببه مرميه فى الشارع وحاجات كتير شبه كده
لما اصالح اتنين متخاصمين او احل مشكله بين زوجين
كل ما يتصادف وربنا يوفقنى إنى أعمل حاجه من الحاجات دى فى أى يوم احس إن اليوم ده حيكون يوم مش عادى .. حيكون يوم حلو يوم سعيد يوم طيب كده .. يوم ممكن يكون مفيهوش مشاكل أومشاحنات وحيكون فيه مشاعر كتيرحلوه
آه والله زى ما باحكى لكم كده .. مشاعر فيها مزيج من راحه وسعاده ورضا
مش عارف المشاعر دى ممكن توصفوها بأنها خيال علمى وللا سلام داخلى وللا تنميه بشريه وللا راحه نفسيه أو دماغ فاضى وللا تفاؤل وتشاؤم من إللى البعض بيعتبروه مكروه
قولوا إللى تقولوه .. المهم إنى إكتشفت إن السعاده مش إنك تكون مبسوط وبتضحك بس .. السعاده الحقيقيه إنك تكتشف إنك تقدر بحاجات بسيطه قوى ممكن تعملها تسعد بيها ناس تانيه من إللى حواليك .. حتى وإنت عمرك ماعرفتهم قبل كده
أنا بس يهمنى أعرف أنا كده إنسان عادى وللا زى مابيقولوا أوفر شويه
بلاش أسأل أحسن واشغلش نفسى وحاسيب الدنيا تمشى زى ماهى ماشيه
ولسه عندى كلام كتير