الشاعر/إسماعيل عبد الهادي يكتب (الفلاحة)

♥ الفلاحة ♥
محلاها البنت الفلاحه
ع الجسر ماشيه الصبحيه
علي راسها مايله زلعتها
والضحكه طالعه بحنيه
تتعاجب بجمال خطوتها
ومعاها  بهانه  وفتحيه
والندي  فارد ع  الغله
مع  طلعت نور الفجريه
ونقش الحنه علي ايديهم
والعيون فى الكحل خايله
والورد  لونه  ع الخدود
والشفايف  نارها قايده
والا   رنة  الخلاخيل
بتهز الارض كده ف ثانيه
وقلوب العشاق ف غيطانها
ده بيحرث وده عينه ع الساقيه
واللي عينه علي فتحيه
واللي قلبه داب ف بهانه
مستني اما يضم الغله
ويروح لام عيون نعسانه
ويخبط دوغري ع الباب
من غير مايلف ولا يدور
ويقول لابوها ياعم دياب
جوزني بنتك ست  بدور
والدوار نملاه بالزينه
وع الزراعيه نعلق  نور
وكل جيرانا مع اهالينا
نقرا الفاتحه بهنا وسرور
وتزغرد فاطمه وشلبيه
وعويس ح يولع ف بخور
ونفرق ع الناس شربات
وكل قلوبنا تزيد محبه
ونخلف صبيان وبنات
ونعيش مع بعض ونتهنا
*( اسماعيل عبد الهادي )*