الشاعر/محمود صلاح يكتب (بقالنا يومين )

بقالنا مدة
بنوصف ملامح وشك
ومش عارفين
بقالنا مدة
 بنرسم فى الهوى عشك
ومش عارفين
بقالنا مدة
 بناخد م القمر اسمك ورسمك
 ومش عارفين
بقالنا مدة
 بنسحب خيوط الكون
بنغزل ضفاير لون
بنبنى م القمر عيون
بنكتب رسم كله ظنون
يمكن علشان
كلنا ف الهوى دايبين
بقالنا مدة ولسه الحبر
واقف ف العروق
لسه وصفنا ورسمنا
ناقصه الجمال والذوق
لسه القمر مكسوف مننا
وبيدارى وشه عننا
وكأنه من جمالك مخنوق
وكأننا زيه برضوا مكسوفين
بقالنا مدة
والكلام كأنه
مسجون ف الكهوف
والغرام نبضه عالى
 زايد فيه الحروف
واللى دارى بحالى
يبعت لنا وصف غالى
يريح كل العاشقين
بقالنا مدة
واحنا تايهين
بنسأل ع الكلام الزين
بنحلم بنور العين
بنسرح من فين لفين
وكأننا لسه يدوب دايبين
بقالنا مدة