كتب الشاعر / عبد الحميد سالم ... فلاح فلنكح ...

( فلاح فلنكح ) م /عبالحميد سالم
 فلاح فلنكح عايش سملطح 
 أهمل دراسته وبقى عقله يشطح
عايش عواطلى لا منه اتعلم  ولا منه فلح
قام افترى ع الجاموسة وقال بتنطح
 وحتى الحمار باعه واشترى تروسيكل
*****
راح الجيم وحلق كابوريا وبقى عنده نت
وع الماسينجر نازل معاكسة فى كل بنت
وراشق ف البيت زى الحطيطة
لا منه راجل ولا منه ست
 ياكل ويشرب وكأنه عجل
*******
نسى أمه اللى ياما شقيت عليه
وكان فطارها كام حرف عيش
وغموسها المش والجبنة القريش
فضل من الله ونعمة وطبيخ مفيش
وطولة يومها  بتسرح بخضار وفجل
********
وابوه م النجمة كان طالع عينيه
سلاحه فاسه وتوكاله عليه
وتحت باطه واخد غداه
عشان يوفر للبيه جنيه
قام رد الجميل وحجر عليه
وباع طينه اللى ياما حافظ عليه
وموته بالحسرة م دمعت عينيه
مهو طلع جبان ولا عنده أصل