كتبت الأستاذة/ رجاء حسين ... يا بحري مسجون ليه؟ ...

يابحري مسجون ليه؟!

رجاء حسين

--------------

يابحري موجك بهتان ليه

والبهجة من وشك مخطوفة

والصخر واقف تبكي عنيه

مكسور وأياديه مكتوفة

يابحري انطق صرخ ليه

هرب  نسيمك من خوفه

يا بحري اصرخ خايف ليه

كل اللي مقسوم  حتشوفه

طول عمر بحري كريم فاتح

أبوابه   بيحب  ضيوفه

مين اللي يقدر ينسى في يوم

كرم جمايله ومعروفه

آسفة يا بحر نسيت إنك

مسجون ومبتورة كفوفه

مقطوع  لسانه  والدنيا

بتغني على دق دفوفه

والكل واقف يتحسر

بصير عيونه مكفوفة

آسفة يابحري لك والله

على البعد واقفة ومكسوفة

مسجونة  أرواحنا  بالسور

بإيدين  حديدُه  ملفوفة

ياحلم  متكتف  بحديد

أرواحنا  وياه  مكتوفة

ملعون حديدُه على خشبه

م القهر  دوَّقنا  صنوفه

على صدر موجك نام يحلم

طفل كسروا له  جاروفه

في شرع مين الرمل يموت

وحرير رمالك مرصوفة

بنوتة حلوة مع ودعها

وقفت توشوش وبحسرة

تتمنى دعوة منصوفة

يابحر بس كفاية دموع

أنا من القهر ملهوفة

==========