كتب الشاعر / عمر بنحيدي ¥التشرميل 1¥

قصيدةزجلية : التشرميل 1

 الشمس ما يخفيها غربال
 والشّمايت مايكونو  رجال
كولشي توٓرّٓقْ 2
تفضح
اش بقا  ما يتخبا
ديرها غير زينة
كولشي يوصل لينا
حتى الكلام البايت
راه مسجل إلى نسينا
شكون خلق التشرميل
وأعطى فرصة لأولاد الليل
  بجناواهم يگرسيو فينا؟ 3
ماشي انتو ما؟
 بوعودكم  خلقتو الغبينة
 الشباب فقد الهمة
 لا خدمة لاردمة
 هادي راه جريمة
 گالس كِ. اليوم كِ. غٓدّٓا
 بدا يرشا ويٓتْصٓدّٓا4
 يشوف نفسو ماعاد شٓيْ
 ميت وهو حٓيْ
 عايش بلا افُق
 عالة  و  بلا حقوق
 حشرة ف. الشقوق
 راه يحلم وهدى ابسط الحقوق
 يصير مثل الناس بلا فروق
 وإلى ما شد ف. راسو
  يشد طريق البحر
   أو  يبدأ  يسكر و يشفر
   هكدا تخمامو 5
   وحدود أحلامو..
 
  الناس تٓعٓشّٓاوْ   و  رٓگْدو
  و هو   يصارع الجوع  اللي عاضُّو
  و ٓغْلابْ عليه.. لقاه وحدو
  واش الجوع والكبت هما سعدو؟
 و ِٓ لآّ  هُوٓ   من عائلة شريفة
 قلبها نقي ويدها نظيفة
 علاش ولد فلان  يتمتع وحدو؟
 ضارب الدنيا بركلة
بّٓاه. ضارب ضربة صحيحة
 وعايش عيشة مريحة
 التشرميل ماليه كروش الحرام
  خفافيش الظلام
هما  أعداء الوطن
الله يتبتنا على الشهادة :
 من أين لك هذا.؟   يا  هذا؟
 والجواب واضح ياسادة
 بلا إعادة كاينة الإفادة
 و   الأتمان شاعلة نيران
  والمدخول مدخول عيان  6
الحركة   ميتة، سادّٓة البيبان
  و الشبعان ماحاس بالجيعان
 هكدا التشرميل بان. 
  گالو زمان :
  كول و وُكّٓل
  راه كبير الكرش تفرگع ليه
  اُورِّيهْ  أُورِّيهْ 7
  حتى إلى عمى
  سير وخليه
  الزمان يجبد ليه ادنيه..

  عمر بنحيدي.   10/10/2019

  مقابل بعض الكلمات:
  1-التشرميل : السرقة تحت التهديد بالسلاح الأبيض.
  2-تورق : ظاهر وواضح.
  3-جناوى:جمع، جنوية.  و هي المدية او السكين الطويل.
  4-يرشا : يضعف ويهترئ. - يتصدا: يعلوه الصدأ.
  5-تخمامو: تفكيره العميق.
  6- المدخول: الدخل او الأجر _مدخول: مريض او ضعيف.
  7-أوريه:  فعل ورّٓى أي أعلم وأخبر