كتب الشاعر/ سمير فرج عبد القادر.. $خوف $

خوف
.......

مفتتح
..........
قلبي عليكي ارتجف لمّا الوجع صابِك
وبصه لسه بقرف ومواربه ليه بابِك ؟
بتشدي قلبي الخزف ترميه علي اعتابِك
وعنيكي زايغه بشغف ع اللي بوجع صابِك
.................................................
قصيدة
.........

انا والنعمة لو فايق ...
ماحكتبلك
واقول فيكي ...
وما فيكي ولا اعتبك
من الاخر
سنيني عجاف بدور فيها علي ضيك
ومش عارف للنفق اخر
من الاخر
محدش مننا دلوقتي بيطبطب علي التاني
بقيتي تعاني م الوحده
وانا راخر .... بقيت زيك ...
كدا ف السكك وحداني
وايه تاني ؟ انا ف شده ...
وفينك ... ؟ عيني مش طيلاكي
مش جنبي
مراية ...
حبنا عامية ومعطوبة
في ليل طوبه
باشد خيالك الباهت علي قلبي
مابدفاشي
احس برودة الايام بتلعبي
من الهاده ...
باشوفك حلم ع الضيق
سراب ماشي ...
امد ايديا مالقاشي
سوي سنيني اللي مدفونه ف تراب
حلمي
لاشيفاني ولا شايفك
اقول يمكن مايجراشي
يومين وح ترجعي تاني
مفيش تاني ولا تالت
وكل مالينا من ذكري ف مفارق
سكتك ... تاهت
وشوق باهت

( أنا مش ح سيبِك كده خليكي مُتفائله
قلبي تِعبْ م الندا وانتي اللي مش سائْله
افتكري يوم هَدْهَدَه وإيديا سنداكي
بتبصي ليه ف السما ؟ وبتلعبي الحِجْلَه)
..................................................

سنين صابر ... وف الاخر
بقيت من صبري ضحكايه
وقولي لبانه سهرايه
تلت الناس كدا وتعجن
ولا حاسه ... ولا سامعه
وانا بشرق
وروحي م الجسد طالعه
بقيت والنعمة مش عارف ....
ليكي داخله ولا طالعه
مع اني ........

(بحبِك موت وبندهلك
انا موجوع ومن أهلِك
وبهرب فيكي وارجعلك
ورب الكعبه انا عاشق
وميّت في تُراب أهلك)
..............................
مع انك.....

( ياست مالك كدا ... طبعك بقا حامي
انا حاشكي للسيده ... مابشوفش قدامي
رمياني بين دا ودا .... ماصّين وريد دمي
رمياني ليه ع الرصيف ورافعه خُدَّامي ؟ )

من الاخر
بقيت والنعمه ياسمره
بخاف منك
...................................
سمير فرج عبد القادر
2/4/2019
12:37Am