كتب الأستاذ/ محمد عبد الحميد حلقة جديدة من..أنا عندي كلام..و %إحنا مش ملايكة %

أنا عندى كلام
إحنا مش ملايكه .. فياريت نتعامل مع بعض على هذا الأساس
ماتزعلش من أخوك أو أختك أو صاحبك أو جارك علشان تصرف حصل منه
ممكن تظن من تصرفه إنه مش بيحبك (وبعض الظن اثم) أو مش مهتم بيك أو تفكر إنه قاصد يخبى عنك أو إنه غيران منك
لام تتأكد ان كل واحد فيه إللى مكفيه ومش مطلوب منه يكشف ستره قدامك
ولا من حقَك أصلا تفرض عليه إمتى يحكيلك .. ولا من حقك تلومه علشان ماتكلمش
سيبه يحكى لك فى الوقت إللى هو شايفه مناسب له .. ممكن دلوقت أو بعد أسبوع أو بعد شهر وممكن ميحكيش خالص .. ده بيبقى حسب حالته النفسيه ومش حسب مزاجك إنت .. النفس البشريَه دى معقده ولها أسرارها إللى محدش قدر يفكها لحد دلوقت
إتعلَم تسامح وتعذر وتعاتب بعشم .. وإتعلم إنك تلتمس الأعذار لأحبابك وأصحابك وإفتكر إنك ممكن تمر بنفس ظروف غيرك ..  وساعتها حتبقى عايز إللى.يقدر ظروفك ومشاعرك .. وحتبقى عايز إللى يسمعك ويحتوى ظروفك .. وفى الوقت إللى إنت تحدده وتختاره وحسب ظروفك إنت حتتكلم وتحكى من غير مايضغط عليك حد أو يعاتبك انسان .. وخليك فاكر دايما إن المسافه بين البدايه والنهايه مهما طالت قصيره قوى ومش مستاهله ولا ناقصه إننا نصعبها على بعض
ولسه عندى كلام