كتب الشاعر/ عادل علي...&يا امه وحشتيني&

كل سنه وانتِ
فى القلب يا حبيبتى
مهما سبتينى
أو غبتِ عن عينى
مبشوفش غيرك انتِ
فى القلب يا حبيبتى
كل سنه وانتِ
فى القلب يا حبيبتى
كان نفسى اقولهالك
وقبل كل الناس
تلاقينى على بابك
بالشوق تقابلينى
وباسمى تنادينى
واسكن فى احضانك
جوايا صرخه شوق
بتقول وحشتينى
يا امه وحشتينى
أصعب فراق وابتدا
والنفس متأكده
مهما يطول الندا
صرخه حنين فى الفضا
لكن على عينى
وأنا راضى باللى انكتب
موتك ف اول رجب
من غير لا لوم ولا عتب
لكن فى عيد الأم
القلب جمره حطب
كان نفسى اهنيكِ
واخواتى حواليكِ
نعيش ف لحظه صفا
ونحس فيها الدفا
من نظره ف عنيكِ
لكن قدر ربنا
ومصير و مكتوبلنا
ياخدك بعيد عننا
لكن مسيرنا ف يوم
يجمعنا تانى بيكِ
انا روحى مطمنه
ولربى مستسلمه
لكن وحشتينى
يا أمه وحشتينى
كان نفسى اقولهالك
كل سنه وانتِ
فى القلب يا حبيبتى
ومهما سبتينى
أو غبتِ عن عينى
مبشوفش غيرك انتِ
كل سنه وانتِ

فى الجنه يا حبيبتى
يا أمه وحشتينى

رحمك الله يا امى
ورحم الله كل آباء وأمهات المسلمين
وجمعنا بكل احبابنا فى مستقر رحمته
ورزقنا جنات النعيم
آمين يارب العالمين

            عادل علي