كتب الشاعر/ سعيد عباس الضو..&أنا اللي باع متاعه عشانك &

انا اللى باقى من حطام البيت
انا اللى ف يوم الشدة ما اتخليت
أنا اللى خليت من ضلامك نور
ماشوفت منك سرور وما اتهنيت
أنا اللى باقى م السنين
أنا ال شالك في العنين
أنا ال وقت الازمه ماكنش عايز
أنا الفايز ب احزانك والانين
واخد نصيبى م الشقا بزيادة
حاطه همومك فيا كالعاده
أسقيكِ

الشهد من ايدى
في عيدى قهوتك ساده
أنا الإنسان أنا اللى اتهان
انا اللى إتباع كما الحيوان
انا اللى واخد 200 جايزه
من النسيان وم الحرمان
أنا المرمى هناك ع الرف
أنا الواقف ف آخر الصف
أنا المدارى ورا الحيطه
أنا المسبوب انا المضروب
من ايديك يجى 300 كف
عشان ساكت ما ب أتكلمش
عشان أهبل وليه ما احلمش
وأدافع عن حلمى ب القوة
ولا تغمضلى عيون ولا رمش
مصير الفجر هيشقشق ويجى اليوم
أشوف الحلم ب عنيا وأقوم م النوم
وشمس الحياه تطلع تدفى سنينى
وتتبخر دموع عينى ال نزلت عوم
أنا اللى باقى من حطام الدار
أنا اللى خليت اللى كرهك غار
أنا اللى ثار لما حس الضيق
أنا ال ولع حريق وكان إعصار
أنا اللى ب عمره اشترى وقت أما باعوا
انا ال جسمه اتهرى ما اشتكى اوجاعوا
أنا اللى حبك وماكنشى طالب مقابل 
وباع عشانك متاعوا وكان راجل
سعيد عباس الضو