كتبت الشاعرة/ نجاح حسنين محمد..والشاعر/ أمين أحمد..&في حب إسكندرية &

يسعدني و يشرفني في ثالث عمل يجمعني ب الشاعرة المتميزة /  نجاح حسنين
 وقصيدة ** في حب اسكندرية**

بحبك يا إسكندرية
وبحب بحرك
لفيت كتير ولا شوفت سحرك
ما احلي المواني
وما احلي ثغرك
عروسة البحر يا مارية
ترابك زعفران
و شمسك هدية
من المرسي أبو العباس
الي الانفوشي
وبنات السيالة
والشمس المياله
اسكندر المقدوني
بناك و علاك
وجمع فاروس و راقودة
وولاك
أميرة علي كل المدن
و خلاك
سلطانة وسط الممالك
بحبك يا اسكندرية
يا مجنونة وغيرك مفيش
وآه علي الكورنيش
و حكاوي بيرم
و اغاني سيد درويش
بحبك يا اسكندرية
يا شقية
يا ساحرة
يا أميرة
يا عروسة
يا جنية

**************************

لما على رملك وقف اﻻسكندر
وقال ياسﻻم على المنظر
هنا حبني مدينتي
وبيها ع الدنيا حتمنظر
والست بدرية وحواري اسكندرية
والحلوة ماشية بحنية
تتمخطر على شط المية
تقولش اجمل بلطية
ايووه يابو اسكندر
على شروقها وغروبها والمنظر
تخلي الكل يعشقها وف جمالها يتحير
ياللي كليو باترا اخدت جمالها منك
مهما يشيخ الزمان حيفضل صغير سنك
يابنت ياللي بتتباهي بحسنك
لو شفتي اسكندرية عروسة البحر
والله حتدبلي وانتي على غصنك
من ابوقير لبحري
هواها نسيم من الجنة بيسري
قالوا عليها زمان
اسكندرية بلد الهوى
تشفي العليل من غير دوا
المينا والمعابد
والكنايس والمساجد
الكل لربه عارف ولفضله ساجد
ياسكندراني ياخفة
اغزل شباكك واعدل الدفة
والمينا والصيادين
وابو العباس واﻻربعين
كلنا اسكندرانية موحدين