كتب الشاعر/خالد سعد &مات حبنا&

( مات حبنا )
حلفت له إنى أنا
اللى بحبه من كام سنه
قالى كلام أنا معرفوش
قالى الوشوش هى الوشوش
بس اللى شايفه معشتهوش
ولا عمرى حسيته أنا
راح الغرام من قلبنا
ومن كتر ما زاد الإختلاف
إتهز فينا حبنا
شوف كام سنه عشنا الهنا
والحب عايش وسطنا
كأنه مولد قبلنا
علشان يلملم يوم ميلادنا فرحنا
ويكون بنالنا عشنا
 نتربي فيه ونعيش في حضنه سعدنا
سنين طويلة شمس الغرام
دفت قلبنا
وفجأه هبت ريح
ظنون ملهاش أساس
وشكوك غريبه
فيها مساس
وكلام كتير
تجريح
تلميح يقول إني خاين
واقولها فين الدليل
ترد من غير إكتراث
كلام كتير بسمعه م الناس
غامت سما الحب
اللي نورها القمر
ماتت ليالي السهر
والشوق علي باب الإختلاف
بناره إنتحر
زاد العناد
ضاع الرضا ويا الوداد
والحب مات في قلبنا
مبقاش في حس يردنا
جروحنا قتلت حسنا
وكأنه عمر الحب ما زار قلبنا
راح الغرام من قلبنا
ومن كتر ما زاد الإختلاف
إتهد عشه في قلبنا
مات حبنا ... مات حبنا
خالد سعد