الرزق من ربنا
==========
الرزق من ربنا بعَتُه ومن فَضله
بين البشر قََسِمُه بِكَرَمه وبعدله
فيه اللى راضى بحاله قَاَنِع و يا بَختُه
عايش كِدا مرتاح ياهناه ويا سعده
ما حملش هَم الرزق الدنيا ما تِهمه
وفيه كمان غَضبَان ناقم على رزقه
عايش حياته حزين مشغول ياطول هَمه
بيجرى جرى الوحوش طَمعان يِزيد رزقه
عُمره ماياخد يوم غير اللى مكتوب له
الرزق ياصاحبى مش بَس مال
ممكن يكون زوجه عندها أخلاق ودين وجمال
ولا يكون ف هدايه وصلاح للعيال
ولا جيران طيبين دا يبقى عال العال
أو سَتر ويا الصحه كمان وراحة بال
ولا يكون عَقل بيفكَر سليم شَغَال
ولسان بِيِذكُر ربنا ما يتوزنش بمال
إحمِد بَقَى ربنا فى كل وقت وحال
واشكر يِزيد رزقك زى الكريم ما قال
بقدرته بكلمه يِصلِح جميع الاحوال
===================
( محمـد عنانى )
ليست هناك تعليقات:
إرسال تعليق