كتبت أم الشعراء أ/ سامية سليمان &رسالة الي الشباب &

رسالة إلي الشباب
-----------------
كل الآمال لمصرنا
ف ولادنا فلذات كبدنا
هُمه سندنا وحلمنا
بيهم ح نبني مجدنا

وبلدنا محتاجة لهمم
وإدين عفية ف المحن
ومصرنا أم الهرم
دُرَّة علي جبين الزمن

لازم نصونها كلنا
بعزيمة وإرادة وعمل
لازم نزوِّد دخلنا
نقضي علي شر الكسل

وفيه عادات دخلت لنا
بتسيء إلينا كلنا
تدخين وإدمان ، بلطجة
دا شيء يهد اللي اتبني

الشغل موجود بالحلال
ف الحب والخير والجمال
حِب الوطن يابن الحلال
إغرس شجر إزرع غلال

والأرض بتنادي الشباب
 هِموا بقه زيلوا الضباب
اللي انفتح له ألف باب
ورايتنا تعلي للسحاب

والجهل سايد في البلاد
والجامعة بتخرَّج كتير
علِّم كبار علِّم ولاد
تاخد ثواب فيهم كبير

العلم دا مجد الأمم
بالعلم راح نصبح قمم
وزويل ضرب أكبر مثل
دخل التاريخ أصبح علم

العلم مش بس ف كتاب
لحروف ألف ولحد ياء
زيدوا الثقافة ف كل باب
راح تنشروا الخير والضياء

والتكنولوجيا ف عصرنا
قدام عنينا وف الفضا
لازم نواصل علمنا
نوصل به لنهاية المدي

وبلاش نقلد كل شيء
ف الغرب والدش اعقله
اللي يناسبك إعمله
واللي يضرك إهمله

حافظ علي الدين الحنيف
أدي الفروض خليك عفيف
قلبك تملّي يكون نضيف
ح تعيش ربيع من غير خريف

عيش بالفضيلة ف الحياة
تنجي من الإيدز اللعين
حاملينه أعداء الحياة
علشان ما يأذوا الطيبين

حافظ علي نقطة مياه
كنز وكبير وهبه الإله
ونقطة من دمَّك نجاه
توهب لآخوك بيها الحياه

من تحت إيدك تلقي جيل
فاهم مثقف شيء جميل
تبني الوطن تعمل جميل
ماانت ابن مصر صحيح أصيل

سامية سليمان