كتب الشاعر/علي عفيفي &أمل الرجوع &

أمل الرجوع
نفس الحاجات متغيرتش نفس الحاجات
تليفوني زي ما هو حافظ نمرتك
وصورتك الحلوة لسه خلفية في جهازي
ورسايلك اللي بعتيهالي
كل الحكاوي
كل الهزار
كل الكلام اللي اتحكى
كل الحاجات المضحكة
لسه ف حيطاني شق نور
بتمنى طيفك ييجي منه في يوم يزور
يحيي في قلبي الفرحة من تاني
ويضخ جوا عروقي من تاني السرور
مش راح أخلي اليأس يملاني
انا جوا صدري في ركن جواني
شايل هوانا فيه ومخبي كل الذكريات
قلبت فيه شوفت الجواب اللي كتبتيه ليا
وكتبتي فيه عهدي معاكي بخط ايديكي
وقولتي فيه أنا ليك وبس
مهما الفراق طول
فضلت حافظ عهدنا ومرضيتش أتحول
ولقيتني صابر ع الفراق وقعدت مستني
ووهبت نفسي رهن أشواقي إكمني
عايش على أمل اللقا
صدقني طال الإنتظار
والفكر ودا كتير وجاب
خايف لأكون بحفظ عهودي
واستنى انك في يوم تعودي
وألقى الخيال كداب
وتضيع معاك كل الحاجات
اللي نويت اوهبها ليك
فإن كنت ناوي ع الفراق
أبوس إيديك
إعمل حساب الإتفاق
اللي حلفنا يعيش ما بينا
خلي أملنا يعيش ياريت
وبلاش تخون قلبي اللي عمره
ما فكر يوم أنه يعاديك
بقلمي #علي عفيفي