كتب الشاعر/ محمد البريمي...*كنتِ ليه*

كنت ليه ..
كنت ليه بتشاورى عليا ..  و تنادينى ..

لما إنتِ ناويه .. ف لحظه تبيعينى ..

خلتينى ليه أحبك .. ليه بس شغلتينى ..

أهون عليا أعيش خالى .. ولا تجرحينى ..

          كنت ليه ..

ما كنتش واخد ع العصيان .. يجى يوم و تعصى عليا ..

ما كنتش واخد ع الخداع ..  يجى يوم و تلعبى بيا ..

تقوليلى بحبك من ورى قلبك .. و قلبك ف ناحيه تانيه ..

و أنا عمال بأرسملك صورة .. ما إتصورتش غدرك ليا ..

         كنت ليه ..

كنت مسلم روحى ليكِ .. كنت باقولك ع اللى ف قلبى ..

كنت فاكر إن حبك .. هيطفى لهيب حبى ..

كنت مصدق إن هواكِ .. على هوى قلبى ..

كنت بأكدب دايماً

ظنى .. و أدارى ف إحساسى و أخبى ..

          كنت ليه ..

كنت عايش ع الأحلام .. كنت بأعد الساعات ..

أسمع صوتك قبل ما أنام .. و أشبع منك سلامات ..

و تطفى نارى بإيدك .. نار الشوق و الآهات ..

و الدموع على خدك .. تعزف نايات ..

بقلم الشاعر .. محمد البريمى ..