كتب الشاعر/محمد مكاوي &حلم العصفور&

حلم العصفور

مره زمان
كان فيه عصفور
واقف مستنى على شجره
العصفور لسه صغيور
كان مستعجل قوى على بكره
حب يطير كدا زى اخواته
و يضرب ف الهوا بجناحاته
يعلا لفوق و يشوف النور
ما يهموش ولا مليون سور
بص لفوق شاف العصافير
ما عملشى حسابك يا نسور
ابتدا يتحرك من عشُّه
و الهوا بيلاعب ريش وشُّه
قام مد جناحه ع الأخر
من فوق الشجره راح ناطط
و ما طارشى زى ما كان فاكر
من اول خطوه راح ساقط
نازل م الجو وبيصَوصَو
جت قطه بتجرى و تنَونَو
وقفت تحت بتستناه
كانت من بعيد شايفاه
العصفور مكسور جناحاته
و كان القط بارم شَنَباتُه
العصفور بيغمض عينه
مين هيغيتُه الله يعينه
فجأه القط بيجرى بعيد
طفل صغير مد الإيد
و بيضحك فرحان و سعيد
والعصفور ف الدنيا وحيد
ربَطُه من رجليه بالخيط
من حواليه نازل تنطيط
العصفور جواه مرعوش
محتاج حد و عنه يحوش
و يرجَّعُه تانى للشجره
للقش و عشُّه المفروش
جت بنت و خدت العصفور
و ف بيتها كانت مؤذيَّه
جابت شمعه و طفت النور
كانت ناويالُه على نيَّه
و لما اتلسوع زاد ف انينُه
فاق من حلمه و فتَّح عينُه
لقى نفسه على فرع الشجره
 و اخواته مستنّيينُه
........................ ...........
              محمد مكاوى
عضو رابطة الزجالين و كتاب الاغانى