كتب الشاعر/يسري عثمان....*أنا السلطان *

مفتتح
-----

لما الحدادى تمر ع العشه بتخرب
بتخوف الزغاليل بحياتها وبتهرب
منهم يروح ليمين والباقى متغرب
ويبقى حال العش
على الحزين يصعب
-------
قصيدة انا السلطان
-----
عشان بكره اللى مايجيشى
بعت وقولت مش فاض
عشان ياستى انا تعيشى
بلاش تبقى فيها القاضى
وتتشكى وتتحكى
تزيدى تعيدى فى المحكى
وفى الماضى
عشان داكله عا الفاضى
انا سايبلك الدفه
ياست الكل ياعفه
تقومى تعوجى الشفه
اقولك كلمه مش عارفه

ياستى دا الغرام مقامات
مش عادى وعدى وفات
يإما تظبطى الموازين
ياتقولى كان راجلنا ومات

لاانا عمرى ما اكون قاسى
ولا اكون حتى سى السيد
ولا صفحه فى كراسى
فيها كام غلطه تتأيد

انا السلطان
انا السلطان طول مانتى
ست الدار
اولع نار دا لو إنتى
فلتى عيار

ياريت لاتقولى داعجز
هو انتى يعنى لسه شباب
دا المفروض انا اتعزز
ونبقى بعد عمر صحاب
تراضينى واراضيكى
واحطك فى حبابى العين
وادعى رب يهديكى
ياشيخه ونشوفولنا يومين
ياشيخه ونشوفولنا يومين