كتب الشاعر/مسعد سليم..زاد الأنين..

زاد الأنين جواك
اهدى يا قلبي اهدى
الحزن بقي مرساك
والحال دا من مده
لساك حزين زعلان
مش لاقي بر امان
ندهت ع الاحلام
سمعاك لكن شارده
وانت خلاص حنيت
لفرحه تيجي تضم
تشبه ميزان البيت
من بعد كسر و هَنّْ
خبطت على بابها
لقيت لها اصحابها
واخدينها من بابها
وسابوا ليك الحلم
احلم يا قلبي احلم
وابني جبال احلام
دا الحلم ليك مأمن
لا  تموتك احزان
خلي السناريو جميل
غربتنا ليلها طويل
واصلب آمال بتميل
منهاره م الايام
احضن سنين حلمك
واسيها .. واجبرها
خلي الامل سندك
بكره تشوف نورها
صبرك صبر ياما ..
على حزن ودراما
وعن فرحه نسيانا
إشتقنا .. لظهورها

        زاد الأنين
✍ مسعد سليم