الشاعر..خالد سعد يكتب..ببات أحلم.

ببات أحلم فى بكره أقوم
وأشد الحيل
وأرجع أعوم
وأصحي تاني يوم
ألاقي حلمي مفارقني
وانادي بعزم ما فيا
يرجع صدي صوتي
حزين مصدوم
يقلي دنيتك هربت
وبكره خلاص غير إمبارح
بلاش تحلم
وتبقي ديما كده سارح
زمااان لك في الحياة ماشي
وكنت عنيد
كسرت كتير شجر طارح
ولا همك آلامه تزيد
ولو عوده يبس منك
بترميه فى نار والعه
تسيبه يقيد
وتمشي بعيد
زمااان كات صحتك موجه
بتركبها وبتعدي بحار الخوف
بقلب حديد
ودلوقتي خلاص راحت
وناس بكيت عليك بحنان
وناس فرحانه وإرتاحت
معدش معاك سوي الدمعه
بتبكي ضعفك الواضح
وبتخبيها من أهلك
عشان دمعك غلط فادح
ومبتشكيش لإن الشكوي
فى قاموسنا نغم فاضح
فلم اللي باقي م الآمال
لأن اللي حصل ورماك
ده لك مرسال
بلاش تحلم
عشان حلمك بقى قتال
وخلصت منك الدنيا
وحتي عيالك الغاليين
حسوا أن حملك مال
لاجاه ولا مال
ولا حتى هناك صحة تشد الظهر
تخلي اللي بعيد عنك
بأيديك منطال
خلاص بحلم بيوم ربي
يعدل حملي م الآخر
ويغفرلي
لأن الجنة
مبندخلهاش بالأعمال
ده لولا رحمة الرحمن
هتبقى الجنة حاجه محال
يارب رجايا فى عفوك
يقربني
ويسقينى حبيب قلبي
من الكوثر
شرابه زلال
( صلي الله علي الحبيب محمد )
خالد سعد