الشاعر الأسطورة..طارق السيد يكتب..فاكر ياما..

فاكر يامّا
فاكر والله يامّا
فاكر كل ضمة
كنتِ تضميهالي
لما تصيبني غمة
فاكر اللحاف
لما كنت اخاف
واخبي راسي تحته
وانتي تطمنيني
ترقيني تبخريني
من عين اللي شاف
فاكر حتى لما
كنا يامّا لمة
ونكسر صيامنا
بكوباية خشاف
وداني لسه سامعة
دعاكِي كل جمعة
ينور لي الطريق
فى ليلي بألف شمعة
فاكر الحنان
والأمن والأمان
فى حجرك لما كنت
أطمن فيه وانام
فاكر الوصايا
وفاكر العصايا
لو مرة عيني تجرح
يوم بنت الجيران
ولما أغيب عليكي
أشوف دموع عنيكي
أخدك فى حضني
وأوطي أبوس إديكي
واقولك فى الختام
يانبع من الحنان
وحشاني يامّا خالص
بعدك راح الآمان
سلام يامّا سلام
سلام يامّا سلام
بقلم طارق السيد