الشاعر/علي عفيفي يكتب (كدبة إبريل)

كدبة إبريل
قالوا على حبنا وعشقنا إنه جميل
ومحدش يعرف إنه كدبة إبريل
عاذرك يا قاسي مش هلوم أنا تاني فيك
جرحي أنا بكى الزمن ولا دمعة سالت من عنيك
لو حبي ليك خيال طاب ولمسة إيدي لإيديك
توصف بإيه غيرتي عليك وأشواقي ليك
قالوا على حبنا وعشقنا إنه جميل
ومحدش يعرف إنه كدبة إبريل
-------------------
قولي ليه الخيانة أساس في طبعك
والغدر أصلا بيرتوي من نبعك
عملت ايه أنا فيك عشان تسقيني خدعك
رفضت ليه إحساسي بيك وحبي فيك
قالوا على حبنا وعشقنا إنه جميل
ومحدش يعرف إنه كدبة إبريل
----------------------
إديتني الأمل وفتحتلي كل الأبواب
وسقيتني من حبك أنا مر وعذاب
بعد ما حبي زاد وفيك قلبي داب
ترمي الهوى والله خسارة أبكي عليك
قالوا على حبنا وعشقنا إنه جميل
ومحدش يعرف إنه كدبة إبريل
-------------------------
حكمك عليا يا زمن كااااان قوي
و سرقت فرحة عمري قبل ما تستوي
وقطفت وردة حبي قبل ما ترتوي
إيه تاني لسه يتعمل علشان أرضيك
قالوا على حبنا وعشقنا إنه جميل
ومحدش يعرف إنه كدبة إبريل
بقلمي #علي عفيفي