الشاعر/أحمد سليم يكتب (بيكيا)

بيكيا بيكيا بيكيا
هموم للبيع
احزان للبيع
قهر الفقير للبيع
حد له شوق ف حاجه
بياع هموم من كترها
كترت وزادت عندى
لو اقدر ابيعها كلها
راح ابيعها وما اخلى
دا الهم بقا فوق التانى
ليه يادنيا فاكرانى
بالهموم ويا الجراح
وليه ف الفرح ناسيانى
اه يانى منك اه يانى
عايش عمرى معاكى أعانى
الهم ليه ملازمنى
والجراح مش سايبانى
اصرخ ياقلم وقول
سمع دول ودول
ع اللى عايش عمره حزين
واللى عايش ذى الغول
دايما ف حقوق الناس واكل
وبياكلها بالساهل
ما هو اصله من الصفوة
والناس هى اللى تستاهل
علطول ساكته على حقوقها
الخوف معشش فى قلوبها
نسيو أن كل شيئ مكتوب
ونصيبها هو اللى يصيبها
بيكيا بيكيا بيكيا بيكيا
بياع هموم مين يشترى
حد له شوق فى حاجه
صحيح دا كله الهم ماليه
طب هيشترى منى انا ليه
ما كله بيه اللى مكفيه

أحمد سليم