انا مش عارف اقولك ايه
عاللي عملته معايا بجد
انت الباشا وانت البيه
وعمري مالقي في وصفك حد
انت العلم وانت الذوق
انت العدل وانت الجد
رح هنشيلك عالراس فوق
ومعاك فرع الخير يمتد
انا مش عارف اقولك ايه
عاللي عملته معايا بجد
عشت ياباشا وكتر خيرك
لحم اكتافي كمان من خيرك
كان مين غيرك هيخليني
اعيش في كرامه
ويعديني لشط سلامه
لا مافيش حد
انت الباشا وانت الحارس
شوفنا الخير قناطير وموارس
لافي جوع لا مرض ولا كوراث
ولا في شباب بتشم ف كُلة
ولا اطفال بتلم سبارس
كتر خيرك لو كان غيرك
كان علي موتي رح يتوالس
وانا مش عارف اقولك ايه
انت الباشا وانت البيه
انت الكلمه وانت الشورة
انت العين الشايفة طريقنا
وإحنا العين العامية الحولة
احنا اللي اتعلمنا الكيكي
واخدنا من الامريكي
علشان يعرف اننا ايه
شعب الباشا وشعب البيه
شعب الهانم ام سيجار
والبسطرمة مع الممبار
والبكيني وموت ياحمار
يلا جميعا نرقص كيكي
وهنختمها بحضرة وزار
ويارب دايما جمعنا
في حفلة ديسكو وسهرة
في بار
‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘
بقلمي صبري قنديل شاعر العرب
ليست هناك تعليقات:
إرسال تعليق