أنا عندى كتير حنين ..
أنا عَندِى كتير حنين ..
بس مش عارف لمين ..
أكيد .. ماهو لغريب ..
وأكيد ماهو .. لجنين ..
حنينى لواحد عجيب ..
بعيد .. ياترى هو فين ..
أكنه منى كتير قريب ..
لكنه ماتطوله الإيدين ..
أكيد ... هو الرهيب ..
آه .. حنينى لنور العين ..
حنينى لأغلى حبيب ..
لسه لوحده .. الأمين ..
مفيش غيره مجيب ..
دايماً يحس بىَّ وبالرنين ..
إحساسه دايماً طبيب ..
بيسمع شجونى ويهزه الأنين ..
ويسمع فى قلبى صوت النحيب ..
كما لو كان .. هوّه القرين ..
من بعده بقيت واحد مريب ..
وشايل هموم ناس محتارين ..
وفكرى شارد يودى ويجيب ..
نفسى أبعت له .. بكلمتين ..
أقول له .. ياريته عنى ما يغيب ..
ويفتكرنى .. ولو بحرفين ..
كان خطه حلو و مصيب ..
ودايماً يكتب .. بالتنوين ..
وحشنى عقله ... النجيب ..
وحلاوة نوره والوجنتين ..
لسه فاكر .. حضنه الرحيب ..
وورده منوره على الجبين ..
وحشنى صوته .. والدبيب ..
بحته ورنته ونبرته والطنين ..
شوفت صورته كان شحيب ..
عرفت أد إيه تعب بالسنين ..
وزعلت على العمر الرتيب ..
اللى عذبنا .. إحنا الإثنين ..
فطين ، وطول عُمره لبيب ..
عشت بعده عُمرى حزين ..
كان نفسى يكون لى نصيب ..
يسعدنى بيه فى العمرين ..
يارب إكتبه لى .. يا رقيب ..
ويكون رفيقى فى الدارين ..
وإشفى يارب .. كل لهيب ..
فى صدورنا و فى العينين ..
وثبت قلوبنا .... يا مجيب ..
و إحفظنا منك .. قريبين ..
م.عبدالفتاح أبوالحسن.
ليست هناك تعليقات:
إرسال تعليق