مسكين ياللي تطاطي
وتقول راح هـ تعدي
وتعدي علي الضهر واظي
نهار أمه ما بيندي
وكل ما أقولك قوم
تخاف من السجان
ومرمي علي الكوم
وريحتك هنا عندي
ليلك مريض بالخوف
وشمسك طاله مرعوبة
بكرة يجي وتشوف
الحلوة مخطوبة
لا هينوبك منها
غير شوية نظرات
تحكي كتير عنها
ما ترد عليك سلامات
نايمه في حضن الغريب
وأنت في توب الضني بتبات
وتقول يا ناس توبة
بطلت أقول من دي
ما أنت اللي كلك غلط
بالع لسان يومك
تمضغ جبال الزلط
وتشق في هدومك
والصبر حبله إتفرط
هد عليك كومك
وماشي ليه خرسان
علي الخطوة بتهدي
قالوا عليك مسكين
وبالمسكنة ماشي
لا أنت مالي العين
ولا عايشها بوليشي
حتة حصاوي حزين
علي أيه ما ترضاشي
علي الدبح بالسكاكين
ساعة الموزة ما تعدي
يا بني مش دنيتك
دي دنية الفاجرين
اللي يبيعوا الميا
في حارة السقايين
ويبعوا الهوي في أزايز
ويروضوا التعابين
وأنت مجرد نفس
ملامحه أكيد هندي
--------
مسكين
الشاعر محمد ضباشه
ليست هناك تعليقات:
إرسال تعليق