الشاعر/محمد ضباشة يكتب(باب الاحتمال )

باب الإحتمال
زي باب المصيدة
إن فك عنك
تلقي الأمور متلخبطة
وإن دنا منك
بأيه تفيد الشعبطة
خمن ومخمخ في اللي جاي
تنزل في حوسة مزروطة
بس ما فيناش أاااااي
ولا فينا حمل لشعوطة
أحسبها بالموجود
وجود بدمعة معيطة
ترميها زهرة نرد
معروفة أرقامها
لكن ليالي الـبرد
ما تعد خدامها
تبني بيوت وتهد
علي صبر أحلامها
فيه أيه معاك محتمل
غير جوقة مزقططة
الله عليك يا فكر
يا معدي بينا هناك
علي أرض بكر
قاعده بتستناك
رافعة إيديها شكر
لما لقت وياك
عناقيد عنب
دبلوا من كتر الحليطة