الشاعر/ابراهيم معوض يكتب(تنهيدة )

تنهيده
ــــــــــــــــــــــ
لما الكلام يجف فوق الشفايف
يطرح سكوت
هتقوم الودان الطيبه من وهمها
وتحسه صوت
تدفع الأقدام بعزم ما فيها
جوا حوارى مسكونه بالسكون
يا أيها المفتون
أوعاك تدارى فتنتك
دا الوهم سلطان ع الحقيقه
ينفخ شموعه ف سكتك
طول ما العيون محاوطها الجفون
الظلم ساير وبقانون
يطفى السجاير ف كفوف تهون
ينزع مروءه كلمتك
فتطب ساكت من سكات
تبدر بذور الألم تطرح آهات
تبعتر ثوابت خطوتك
ألوى ف رقاب الحقايق
ما الكل دايق
نفس اللى دايقه ف محنتك
تشبع بطون الشبعانين
بأخر شفطه ف كاس الجوع
تعلا العماير من دم اصحاب النجوع
وكل اللى صاير بيقفل شفايف بسمتك
و بآخر نفس ف صدر النور
نبنى الضلام
ننوى الكلام نرميه بذور
يطرح بزور يفرج ملامح كربتك
ويرضى أذواق الزحام
دا حتى ابراج الحمام
ساكنها الصقور
أطب ساكت من سكات
وأغرق ف الضلمه عصور
معصور وسط أكوام الرفات
وكل اللى فات مخصوم من حريتك
ـــــــــــــــــــــــــــــ
إبراهيم معوض