الشاعر/ أحمد سيد أحمد يكتب(سلام مربع)

سلام مربع للعيان
و لكل مصلحة مهرية
تعبانة م الصب يا جدعان
تقعد و تهتف .. وطنية
و صاحبها كان راجل غلبان
مستنى قرصين طعمية
صبوا له كام لتر بتنجان
مصلحته صبحت مكوية
        ********
تعبان و من هدمته عريان
و مرارته طافحة معبية
داخل ف مستشفى القطران
نايم ف أوضة مصدية
عايز دوا يشفى التوهان
أو حقنة تديه قومية
مستشفى من صنع الحرمان
إهمال و أطفال مرمية
فى الفجر تهتف ف المليان
و تقول بلادى العربية
أناشيد تجيب سل و أحزان
ملامحها كلها مصرية
(احمدسيداحمد)